റിയാദ്: സഊദിയിൽ രണ്ട് സ്കൂൾ ജീവനക്കാരെ കൊലപ്പെടുത്തിയ വിദേശിയുടെ വധശിക്ഷ നടപ്പാക്കിയതായി ആഭ്യന്തര മന്ത്രാലയം അറിയിച്ചു. മൂന്ന് വർഷം മുമ്പ് റിയാദിലെ  പ്രശസ്തമായ സ്വകാര്യ സ്‌കൂളില്‍ സ്വദേശി പൗരന്‍ അബ്ദുല്‍ അസീസ് ബിന്‍ ഫൈഹാന്‍ അല്‍ഉതൈബി, ഫലസ്തീന്‍ പൗരന്‍ മുഹമ്മദ് ഇസ്മായില്‍ അല്‍ദവീ എന്നിവരെ വെടിവെച്ച് കൊന്ന ഇറാഖി വംശജന്‍ ഉസാമ ഫൈസല്‍ നജമിന്റെ വധശിക്ഷയാണ് നടപ്പിലായത്.

      2017 ല്‍ റമദാന്‍ അഞ്ചിനായിരുന്നു രാജ്യത്തെ നടുക്കിയ ഇരട്ടക്കൊലപാതകം അരങ്ങേറിയത്. വെടിയേറ്റ മറ്റൊരു ജീവനക്കാരന്‍ ഗുരുതര പരിക്കുകളോടെ രക്ഷപ്പെട്ടിരുന്നു. ഇതേ സ്ഥാപനത്തിൽ ജോലിക്കാരനായിരുന്ന പ്രതി  സ്ഥാപനത്തില്‍നിന്ന് പിരിച്ചുവിട്ട ശേഷം  ഒരു ദിവസം സ്‌കൂളില്‍ എത്തുകയും സഹപ്രവര്‍ത്തകരായിരുന്ന മൂന്ന് പേര്‍ക്ക് നേരെ പ്രകോപനമൊന്നും കൂടാതെ തുരുതുരാ വെടിയുതിര്‍ക്കുകയുമായിരുന്നു. ഇതിന് ശേഷം രക്ഷപ്പെട്ട പ്രതിയെ ഒരു മാസം പിന്നിടുന്നതിന് മുമ്പായി സുരക്ഷാവിഭാഗം പിടികൂടുയായിരുന്നു.