ചീമേനി: ന്യൂനപക്ഷ വിഭാഗത്തിലെ ഒന്ന് മുതല്‍ പത്ത് വരെയുള്ള  വിദ്യാര്‍ഥികള്‍ക്കായി കേന്ദ്ര ന്യൂനപക്ഷ മന്ത്രാലയം ഏര്‍പ്പെടുത്തിയ പ്രീമെട്രിക് സ്‌കോളര്‍ഷിപ്പിന് അപേക്ഷ ക്ഷണിച്ചെങ്കിലും അപേക്ഷിക്കാന്‍ കടമ്പകളേറെ. ഈ വര്‍ഷം മുതല്‍ മുഴുവന്‍ ക്ലാസുകളിലേക്കുമുള്ള അപേക്ഷകള്‍ ഓണ്‍ലൈനായി നാഷനല്‍ സ്‌കോളര്‍ഷിപ് പോര്‍ട്ടല്‍ മുഖേനയാണ് സമര്‍പ്പിക്കേണ്ടത്. കഴിഞ്ഞ വര്‍ഷം ഒന്‍പത്, പത്ത്  ക്ലാസുകളിലെ വിദ്യാര്‍ഥികള്‍ക്ക് മാത്രമേ ഇങ്ങനെ അപേക്ഷിക്കേണ്ടതുണ്ടായിരുന്നുള്ളൂ.
മുഴുവന്‍ തുകയും കേന്ദ്രസര്‍ക്കാര്‍ വിഹിതമാക്കിയതാണ്  മുഴുവന്‍ ക്ലാസുകളിലെയും അപേക്ഷകള്‍ നാഷനല്‍ സ്‌കോളര്‍ഷിപ് പോര്‍ട്ടലിനു കീഴിലാക്കിയതിനു കാരണം. അപേക്ഷ ക്ഷണിച്ച് ഒരാഴ്ച പിന്നിട്ടിട്ടും ഓണ്‍ലൈന്‍ വഴി അപേക്ഷിക്കാനുള്ള സൈറ്റ് തുറന്നിട്ടില്ല. സൈറ്റ് തുറന്നാല്‍ ഓപ്പണ്‍ഡ് എന്ന് കാണിക്കുന്നുണ്ടെങ്കിലും സൈറ്റിലേക്ക് പ്രവേശിക്കാന്‍ കഴിയുന്നില്ല. ജൂലൈ 31 അവസാന തിയതിയായി നിശ്ചയിച്ചെങ്കിലും അപേക്ഷകരുടെ ആവശ്യപ്രകാരം ഓഗസ്റ്റ് അവസാനത്തേക്ക് തിയതി നീട്ടിയിട്ടുണ്ട്.
അതേസമയം  കഴിഞ്ഞവര്‍ഷം അപേക്ഷിച്ച വിദ്യാര്‍ഥികളില്‍ നിന്നും  സ്‌കോളര്‍ഷിപ് തുക അനുവദിച്ചവരുടെ  ബെനഫിഷ്യറി ലിസ്റ്റ് ഇതുവരെ  പ്രസിദ്ധീകരിച്ചിട്ടില്ല. ഇതുമൂലം അപേക്ഷയോടൊപ്പം നിര്‍ബന്ധമായി രേഖപ്പെടുത്തണമെന്ന് സര്‍ക്കുലറില്‍ നിര്‍ദ്ദേശിച്ച ഫ്രഷ്, റിന്യൂവല്‍  കോളം പൂരിപ്പിക്കേണ്ടത് എങ്ങനെയെന്നതില്‍ സ്‌കൂളധികൃതര്‍ക്ക് ആശയക്കുഴപ്പമുണ്ട്.
ഓണ്‍ലൈന്‍ അപേക്ഷയോടൊപ്പം തന്നെ കുട്ടിയുടെ മതം, രക്ഷിതാവിന്റെ വരുമാനം എന്നിവ തെളിയിക്കുന്നതിനായി സ്വയം സാക്ഷ്യപ്പെടുത്തിയ സത്യവാങ്മൂലം സ്‌കാന്‍ ചെയ്ത് അപ് ലോഡ് ചെയ്യേണ്ടതുണ്ട്. ഇത് അപേക്ഷകര്‍ക്ക് കൂടുതല്‍ പ്രയാസമുണ്ടാക്കുന്നതാണ്.
പ്രൈമറി സ്‌കൂളിലെ വിദ്യാര്‍ഥികള്‍ക്ക് അപേക്ഷിക്കാനുള്ള സൗകര്യം സ്‌കൂള്‍ മേധാവി ഒരുക്കേണ്ടതുണ്ട്.  നെറ്റ് സൗകര്യമില്ലാത്ത സ്‌കൂളുകള്‍ക്കാണ് ഇത് കൂടുതല്‍ പ്രയാസം സൃഷ്ടിക്കുക. ഇങ്ങനെയുള്ളവര്‍ക്കായി എ.ഇ.ഒ, ഡി.ഇ.ഒ സൗകര്യം ചെയ്തു കൊടുക്കണമെന്ന് നിര്‍ദേശമുണ്ടെങ്കിലും പ്രായോഗികമായി നടത്താന്‍ പ്രയാസമാണ്. ഓരോ വിദ്യാര്‍ഥിയുടെയും രേഖകള്‍ അപ്‌ലോഡ് ചെയ്യേണ്ടി വരുന്നതിനാല്‍ ഭീമമായ തുക നെറ്റ് കഫേകളില്‍ കൊടുക്കേണ്ടതായി വരും.
വരുമാന പരിധി ഒരു ലക്ഷമായി നിശ്ചയിച്ചത് ഉയര്‍ത്തണമെന്ന ആവശ്യവും ശക്തമാണ്. ബാങ്ക് അക്കൗണ്ടുമായി ആധാര്‍ ലിങ്ക് ചെയ്യാനുള്ള നിര്‍ദേശവും സര്‍ക്കുലറില്‍ എടുത്ത് പറയുന്നുണ്ട്. മുന്‍ വര്‍ഷങ്ങളില്‍ ബാങ്ക് അക്കൗണ്ട് വിവരങ്ങള്‍ ശരിയായി നല്‍കിയവര്‍ക്കു പോലും അനുവദിച്ച തുക ബാങ്ക് അക്കൗണ്ടിലെത്താത്തത് രക്ഷിതാക്കള്‍ക്ക് സ്‌കോളര്‍ഷിപ്പിന് അപേക്ഷിക്കുന്നതില്‍ പൊതുവേ താല്‍പര്യക്കുറവുണ്ടാക്കിയിട്ടുണ്ട്.