ഉദിന്‍: ഇറ്റാലിയന്‍ സീരി എയില്‍ റൊണാള്‍ഡോയുടെ ചിറകിലേറി യുവന്റസ് കുതിപ്പ് തുടരുന്നു. ഇന്നലെ നടന്ന മത്സരത്തില്‍ എതിരില്ലാത്ത രണ്ട് ഗോളുകള്‍ക്ക് ഉദിനെസിനെയാണ് യുവന്റസ് പരാജയപ്പെടുത്തിയത്. 33ാം മിനുട്ടില്‍ ബെന്റാന്‍സറും 37ാം മിനുട്ടില്‍ ക്രിസ്റ്റ്യാനോ റൊണാള്‍ഡോയും യുവന്റസിന് വേണ്ടി ഗോള്‍ നേടി. മത്സരത്തിലുടനീളം മികച്ച പ്രകടനമാണ് യുവന്റസ് കാഴ്ചവച്ചത്. കളിയുടെ 60 ശതമാനത്തോളം പന്ത് കൈവശം വച്ച യുവന്റസ് എട്ടു ഷോട്ടുകളാണ് ഉദിനസിന്റെ വലയിലേക്ക് പായിച്ചത്. പക്ഷേ ഗോള്‍വലക്ക് മുന്നില്‍ മാസ്മരിക പ്രകടനം കാഴ്ചവച്ച ഗോള്‍കീപ്പര്‍ സിമോണ്‍ സ്‌കഫെറ്റ് ഉദിനെസിനെ വന്‍ പരാജയത്തില്‍നിന്ന് രക്ഷിക്കുകയായിരുന്നു.
പീഡനാരോപണ വിവാദങ്ങള്‍ക്കിടെയാണ് പോര്‍ച്ചുഗീസ് സൂപ്പര്‍താരം ക്രിസ്റ്റ്യാനോ റൊണാള്‍ഡോ ഉദിനെസിനെതിരേ കളത്തിലിറങ്ങിയത്. മികച്ച ഫോമില്‍ കളിച്ച റൊണാള്‍ഡോ കളിയുടെ 37ാം മിനുട്ടില്‍ യുവന്റസിനായി ലക്ഷ്യംകാണുകയും ചെയ്തു. ഈ സീസണില്‍ യുവന്റസിലെത്തിയ റൊണാള്‍ഡോ ടീമിനായി നേടുന്ന നാലാം ഗോള്‍ കൂടിയാണിത്. ഇറ്റാലിയന്‍ സീരി എയില്‍ കളിച്ച എട്ടു മത്സരങ്ങളും വിജയിച്ചാണ് യുവന്റസിന്റെ പടയോട്ടം. പട്ടികയില്‍ രണ്ടാം സ്ഥാനത്തുള്ള നാപോളിയുമായി ഒന്‍പത് പോയിന്റിന്റെ വ്യത്യാസമുണ്ട് യുവന്റസിന്. എട്ടു മത്സരങ്ങളില്‍നിന്ന് 18 ഗോളുകള്‍ നേടിയ യുവന്റസ് അഞ്ച് ഗോളുകളാണ് വഴങ്ങിയത്. മറ്റു മത്സരങ്ങളില്‍ റോമ 2-0ത്തിന് എംപോളിയെയും പാര്‍മ 3-1ന് ജെനോവയെയും പരാജയപ്പെടുത്തി.

ബയേണ്‍ മ്യൂണിക്കിന് തോല്‍വി
ജര്‍മന്‍ ബുണ്ടസ് ലിഗയില്‍ നിലവിലെ ചാംപ്യന്മാരായ ബയേണ്‍ മ്യൂണിക്കിന് വന്‍ തോല്‍വി. ബയേണിന്റെ ഹോംഗ്രൗണ്ടില്‍ നടന്ന മത്സരത്തില്‍ എതിരില്ലാത്ത മൂന്ന് ഗോളുകള്‍ക്ക് ബൊറൂസിയ മോന്‍ചെഗ്ലാഡ്ബാച്ചാണ് ബയേണിനെ തകര്‍ത്ത് തരിപ്പണമാക്കിയത്. സീസണില്‍ ബയേണിന്റെ രണ്ടാം തോല്‍വിയാണിത്. ഇതോടെ പോയിന്റ് പട്ടികയില്‍ അഞ്ചാംസ്ഥാനത്താണ് ബയേണ്‍ മ്യൂണിക്. ബൊറൂസിയ മോന്‍ചെഗ്ലാഡ്ബാച്ചിന് വേണ്ടി
അലസ്സാനെ പ്ലീ (10), ലാര്‍സ് സ്റ്റിന്‍ഡില്‍ (16), പാട്രിക്ക് ഹെര്‍മാന്‍ (88) എന്നിവര്‍ ഗോള്‍ നേടി. വിജയത്തോടെ ബൊറൂസിയ പോയിന്റ് പട്ടികയില്‍ രണ്ടാം സ്ഥാനത്തേക്ക് കയറി. ഏഴ് മത്സരങ്ങളില്‍നിന്ന് ബൊറൂസിയക്ക് 14ഉം ബയേണിന് 13ഉം പോയിന്റാണുള്ളത്.

ശനിദശ മാറാതെ റയല്‍
ചാംപ്യന്‍സ് ലീഗില്‍ സി.എസ്.കെ.എ മോസ്‌കോയോട് പരാജയപ്പെട്ട റയലിന് ലാലിഗയിലും തോല്‍വി. ഇന്‍ജുറി ടൈമില്‍ വഴങ്ങിയ ഗോളിന് ഡിപോര്‍ട്ടിവോ അലാവസിനോടാണ് റയല്‍ പരാജയപ്പെട്ടത്. 95ാം മിനുട്ടില്‍ മനു ഗാര്‍ഷ്യയാണ് ഡിപോര്‍ട്ടിവോ അലാവസിന്റെ വിജയഗോള്‍ നേടിയത്. മത്സരത്തിന്റെ 70 ശതമാനവും പന്ത് കൈവശം വച്ചെങ്കിലും റയലിന് ഗോള്‍ നേടാനായില്ല. തോല്‍വിയോടെ റയലിന് പോയിന്റ് പട്ടികയില്‍ ഒന്നാം സ്ഥാനത്തെത്താനുള്ള സുവര്‍ണാവസരം നഷ്ടപ്പെട്ടു. ഏഴ് മത്സരങ്ങളില്‍ നിന്ന് 14 പോയിന്റുമായി ബാഴ്‌സലോണയാണ് പട്ടികയില്‍ മുന്‍പിലുള്ളത്. രണ്ടാമതുള്ള റയലിന് എട്ടു കളികളില്‍ നിന്ന് 14 പോയിന്റാണുള്ളത്. മറ്റു മത്സരങ്ങളില്‍ ലെഗാനസ് 1-0 റയോ വല്ലെക്കാനോയെയും റിയല്‍ വല്ലഡോലിഡ് 1-0 ത്തിന് ഹ്യുയസ്‌കയേയും പരാജയപ്പെടുത്തി.