ഹിദായ നഗര്‍ (തിരൂരങ്ങാടി): ദാറുല്‍ഹുദാ ഇസ്‌ലാമിക് സര്‍വകലാശാല പൂര്‍വ വിദ്യാര്‍ഥി സംഘടന ഹാദിയ സംഘടിപ്പിക്കുന്ന നാലാമത് റമദാന്‍ പ്രഭാഷണപരമ്പരക്ക് ഹിദായ നഗരിയില്‍ തുടക്കമായി. പഞ്ചദിന പ്രഭാഷണ പരമ്പരയുടെ ഉദ്ഘാടനം എസ്.കെ.എസ്.എസ്.എഫ് സംസ്ഥാന പ്രസിഡന്റ് സയ്യിദ് ഹമീദലി ശിഹാബ് തങ്ങള്‍ നിര്‍വഹിച്ചു. സാംസ്‌കാരിക വളര്‍ച്ചയിലൂടെയാണ് സാമൂഹിക മുന്നേറ്റം സാധ്യമാവുകയെന്നും ധാര്‍മികവും സാമൂഹികബോധവുമുള്ള സമൂഹ സൃഷ്ടിപ്പിന് വീട്ടകങ്ങളില്‍ നിന്നുതന്നെ സാംസ്‌കാരിക ബോധം വളര്‍ത്തിയെടുക്കേണ്ടതുണ്ടെന്നും അദ്ദേഹം പറഞ്ഞു.
ദാറുല്‍ഹുദാ ജന. സെക്രട്ടറി ചെമ്മുക്കന്‍ കുഞ്ഞാപ്പു ഹാജി അധ്യക്ഷനായി. ദാറുല്‍ഹുദാ വി.സി ഡോ. ബഹാഉദ്ദീന്‍ മുഹമ്മദ് നദ്‌വി, കെ.എം സൈതലവി ഹാജി കോട്ടക്കല്‍, സി.യൂസുഫ് ഫൈസി മേല്‍മുറി, ഹസന്‍ കുട്ടി ബാഖവി, ഡോ. യു.വി.കെ മുഹമ്മദ്, യു. ശാഫി ഹാജി ചെമ്മാട്, ഹംസ ഹാജി മൂന്നിയൂര്‍ സംബന്ധിച്ചു. മുസ്തഫ ഹുദവി ആക്കോട് മുഖ്യപ്രഭാഷണം നടത്തി. സമാപന ദുആക്ക് സയ്യിദ് ഫഖ്‌റുദ്ദീന്‍ തങ്ങള്‍ കണ്ണന്തളി നേതൃത്വം നല്‍കി. ശരീഫ് ഹുദവി ചെമ്മാട് സ്വാഗതവും പി.കെ നാസിര്‍ ഹുദവി നന്ദിയും പറഞ്ഞു..
ഇന്ന് കോഴിക്കോട് ഖാസി സയ്യിദ് മുഹമ്മദ് കോയ തങ്ങള്‍ ജമലുല്ലൈലി ഉദ്ഘാടനം ചെയ്യും. കെ.എം സൈതലവി ഹാജി കോട്ടക്കല്‍ അധ്യക്ഷനാകും. 'സന്തുഷ്ട വാര്‍ധക്യം: ഹൃദ്യമരണം' എന്ന വിഷയത്തില്‍ മുസ്തഫ ഹുദവി ആക്കോട് പ്രഭാഷണം നടത്തും.
ഞായറാഴ്ച പ്രാര്‍ഥനാ സമ്മേളനത്തോടെയാണ് പരിപാടി സമാപിക്കുക.