ന്യൂഡല്‍ഹി: അറവിനായി മാടുകളെ വില്‍ക്കുന്നത് നിരോധിച്ചുകൊണ്ടുള്ള വിജ്ഞാപനത്തെ കേന്ദ്ര സര്‍ക്കാര്‍ ന്യായീകരിച്ചു. മൃഗങ്ങളോടുള്ള ക്രൂരത തടയുക എന്ന ഉദ്ദേശത്തോടെയാണ് അറവിന് നിയന്ത്രണമേര്‍പ്പെടുത്തിക്കൊണ്ടുള്ള പുതിയ നിയമം കൊണ്ടുവന്നതെന്നാണ് കേന്ദ്ര നഗരവികസനമന്ത്രി എം. വെങ്കയ്യ നായിഡു പറയുന്നത്. സുപ്രിം കോടതി പുറപ്പെടുവിച്ച നിരീക്ഷണങ്ങളുടെയും മൃഗങ്ങളോടുള്ള ക്രൂരത തടയുന്നതുസംബന്ധിച്ച് പഠിച്ച പാര്‍ലമെന്ററി കമ്മിറ്റിയുടെ ശുപാര്‍ശകളുടെയും അടിസ്ഥാനത്തിലാണ് നിയമം കൊണ്ടുവന്നത്.
വിജ്ഞാപനത്തിനെതിരേ രാജ്യവ്യാപകമായി പ്രതിഷേധം ഉയരുകയും ബി.ജെ.പി ഇതര കക്ഷികള്‍ ഭരിക്കുന്ന സംസ്ഥാനങ്ങള്‍ എതിര്‍പ്പ് അറിയിക്കുകയും ചെയ്ത പശ്ചാത്തലത്തില്‍ ട്വിറ്ററിലൂടെയാണ് കേന്ദ്രമന്ത്രി ഇക്കാര്യം അറിയിച്ചത്.
വിജ്ഞാപനം ഇറങ്ങിയതിനു പിന്നാലെ ഇതുസംബന്ധിച്ച് വിവിധ കോണുകളില്‍ നിന്ന് വ്യത്യസ്ത അഭിപ്രായങ്ങള്‍ ഉയര്‍ന്നിട്ടുണ്ട്. ഇതു സര്‍ക്കാര്‍ പരിശോധിക്കുമെന്ന് മന്ത്രി പറഞ്ഞു. അതേസമയം, പുതിയ നിയമം ബംഗ്ലാദേശിലേക്കുള്ള നിയമവിരുദ്ധ കാലിക്കടത്ത് തടയാന്‍ സഹായകരമാവുമെന്ന് ബി.ജെ.പി മേഘാലയ ഘടകം അധ്യക്ഷന്‍ ഷിബുന്‍ ലിങ്‌ദോ പറഞ്ഞു.
അതിനിടയില്‍ കേന്ദ്രസര്‍ക്കാര്‍ കൊണ്ടുവന്ന വിജ്ഞാപനം ബി.ജെ.പിയുടെ ഇരട്ടത്താപ്പ് തുറന്നുകാട്ടുന്നതാണെന്ന് കോണ്‍ഗ്രസ് ആരോപിച്ചു. ഗോവധനിരോധനം രാജ്യത്താകമാനം നടപ്പാക്കുകയാണെങ്കില്‍ എന്തുകൊണ്ട് ഗോവയിലും മണിപ്പൂരിലും പ്രാവര്‍ത്തികമാക്കുന്നില്ലെന്ന് കോണ്‍ഗ്രസ് നേതാവ് മീം അഫ്‌സല്‍ ചോദിക്കുന്നു. അറവ് നിരോധനത്തെ എതിര്‍ത്ത് ഡി.എം.കെ, സി.പി.ഐ, ഇന്ത്യന്‍ നാഷനല്‍ ലീഗ്, വിടുതലൈ ചിരുതൈകള്‍, മനിതനേയ മക്കള്‍ കക്ഷി എന്നീ പാര്‍ട്ടികളും രംഗത്തുവന്നിട്ടുണ്ട്. കേന്ദ്രസര്‍ക്കാരിന്റെ തീരുമാനത്തെ അപലപിക്കുന്നതായീ ഈ കക്ഷികള്‍ സംയുക്ത പ്രസ്താവനയില്‍ വ്യക്തമാക്കി.