കോഴിക്കോട്: റാഫേല്‍ അഴിമതി, ന്യൂനപക്ഷ പ്രീണനം, പെട്രോള്‍ ഡീസല്‍, പാചകവാതക വിലവര്‍ധന തുടങ്ങിയ കേന്ദ്ര സര്‍ക്കാരിന്റെ ജനദ്രോഹ നയങ്ങള്‍ക്കെതിരേ യൂത്ത് കോണ്‍ഗ്രസ് ജില്ലാ കമ്മിറ്റിയുടെ നേതൃത്വത്തില്‍ ആദായനികുതി ഓഫിസിലേക്ക് മാര്‍ച്ച് നടത്തി. ഡി.സി.സി യില്‍ നിന്ന് പ്രകടനമായെത്തിയ പ്രതിഷേധ മാര്‍ച്ച് പൊലിസ് തടഞ്ഞു.
ഉദ്ഘാടനത്തിനു ശേഷം പ്രവര്‍ത്തകര്‍ പൊലിസ് സ്ഥാപിച്ച ബാരിക്കേഡുകള്‍ തള്ളിമാറ്റാന്‍ ശ്രമിച്ചത് നേരിയ സംഘര്‍ഷത്തിനിടയാക്കി. പൊലിസ് പ്രവര്‍ത്തകര്‍ക്കുനേരെ ജലപീരങ്കി പ്രയോഗിച്ചു.
യൂത്ത് കോണ്‍ഗ്രസ് പാര്‍ലമെന്റ് സെക്രട്ടറി ജെയ്‌സല്‍ അത്തോളിയുടെ അധ്യക്ഷതയില്‍ എം.കെ രാഘവന്‍ എം.പി മാര്‍ച്ച് ഉദ്ഘാടനം ചെയ്തു. വാചകമടികൊണ്ട് രക്ഷപ്പെടുന്ന പ്രധാനമന്ത്രിയാണ് മോദിയെന്ന് അദ്ദേഹം പറഞ്ഞു. തെരഞ്ഞെടുപ്പ് സമയത്ത് മോദി പറഞ്ഞ വാഗ്ദാനങ്ങളൊന്നും പാലിക്കപ്പെട്ടില്ല. രാജ്യം എല്ലാകാര്യത്തിലും പിറകോട്ടു പോകുകയാണ്.
ഇന്ത്യാ രാജ്യത്തെ സമ്പന്നരുടെ കള്ളപ്പണം വെളുപ്പിക്കാനുള്ളതായിരുന്നു നോട്ടുനിരോധനം. ഭരണമികവ് കൊണ്ടുവരാത്ത ഭരണാധികാരിയാണ് മോദിയെന്നും അദ്ദേഹം കുറ്റപ്പെടുത്തി.
ഡി.സി.സി പ്രസിഡന്റ് അഡ്വ. ടി. സിദ്ദിഖ്, യൂത്ത് കോണ്‍ഗ്രസ് സംസ്ഥാന ജനറല്‍ സെക്രട്ടറിമാരായ എം.പി ആദം മുല്‍സി, എം. ധനീഷ് ലാല്‍, വിദ്യാ ബാലകൃഷ്ണന്‍, ദിനേശ് പെരുമണ്ണ സംസാരിച്ചു.