കോഴിക്കോട്: ഗോകുലം കേരള എഫ്.സി പരിശീലകനായിരുന്ന ബിനോ ജോര്‍ജ് ഇനി കേരളത്തിന്റെ പരിശീലകന്‍. ബിനോ ജോര്‍ജിനെ പരിശീലകനായി നിയമിച്ചതായി കേരള ഫുട്‌ബോള്‍ അസോസിയേഷന്‍ അറിയിച്ചു. വരാനിരിക്കുന്ന സന്തോഷ് ട്രോഫി യോഗ്യതാ മത്സരങ്ങളില്‍ ബിനോ ജോര്‍ജ് ആകും കേരളത്തെ പരിശീലിപ്പിക്കുക.
അവസാന മൂന്നു സീസണുകളിലായി ഗോകുലം കേരള എഫ്.സിയുടെ പരിശീലകനായിരുന്നു ബിനോ. ഗോകുലത്തെ ഐ ലീഗിലെ പ്രധാന ശക്തിയാക്കി മാറ്റുന്നില്‍ നിര്‍ണായക പങ്കുള്ള പരിശീലകനാണ് ബിനോ. കഴിഞ്ഞ സീസണ്‍ അവസാനത്തോടെ ഗോകുലത്തിന്റെ മുഖ്യപരിശീലക സ്ഥാനം ബിനോ ജോര്‍ജ് ഒഴിഞ്ഞിരുന്നു.
ബിനോ ജോര്‍ജിനൊപ്പം അസിസ്റ്റന്റ് പരിശീലകനായി ടി.ജി പുരുഷോത്തമനെയും നിയമിച്ചിട്ടുണ്ട്. ഇത്തവണ സന്തോഷ് ട്രോഫി തിരിച്ചുപിടിക്കണമെന്ന ലക്ഷ്യത്തോടെയാണ് മികച്ച പരിശീലകനെ എത്തിച്ചിട്ടുള്ളത്.