കോട്ടയം: ജൈവ വളവും- കീടനാശിനികളും ഉപയോഗിച്ചുളള പരമ്പരാഗത കൃഷിയാണ് സര്‍ക്കാര്‍ ഔദ്യോഗികമായി പ്രോത്സാഹിപ്പിക്കുകയെന്നു മന്ത്രി  വി.എസ് സുനില്‍ കുമാര്‍ .
മരങ്ങാട്ടുപിള്ളി ഗ്രാമപഞ്ചായത്ത്, കൃഷിഭവന്‍, മണ്ണയ്ക്കനാട് പ്രതീക്ഷ വെജിറ്റബിള്‍ സംഘം എന്നിവയുടെ ആഭിമുഖ്യത്തില്‍ ആരംഭിച്ച പ്രതീക്ഷ ഇക്കോ ഷോപ്പിന്റെയും ഇക്കോ ഫുഡ്‌സിന്റെയും (പഴം പച്ചക്കറി മൂല്യവര്‍ദ്ധിത ഉല്‍പ്പന്ന ഉല്‍പ്പാദന യൂനിറ്റ്) ഉദ്ഘാടനം നിര്‍വഹിക്കുകയായിരുന്നു അദ്ദേഹം.
രാസവളം-കീടനാശിനി പ്രയോഗിച്ചുളള കൃഷി ഭക്ഷണത്തെ മനുഷ്യന്റെ ശത്രുവാക്കിയിരിക്കുന്നു. കാന്‍സര്‍ രോഗബാധിതരായി ഒന്നരലക്ഷത്തോളം പേരാണ് തിരുവനന്തപുരം ആര്‍.സി.സിയില്‍ ഒരു വര്‍ഷം ചികിത്സയ്‌ക്കെത്തുന്നത്. ജൈവ രീതിയിലൂടെ ഉയര്‍ന്ന കാര്‍ഷിക ഉത്പാദനം സാധ്യമല്ല എന്നതിനേക്കാള്‍ ജനങ്ങളുടെ രോഗാകുലതയാണ് സര്‍ക്കാരിന്റെ മുഖ്യ ആശങ്ക. അന്താരാഷ്ട്ര നിലവാരത്തിലുളള സാങ്കേതിക വിദ്യ അടിസ്ഥാനമാക്കിയുളള മൂല്യവര്‍ധിത ഉല്‍പന്നങ്ങളുടെ ഉല്പാദന കേന്ദ്രങ്ങള്‍ എല്ലാ ജില്ലയിലും ആരംഭിക്കുമെന്നും അദ്ദേഹം പറഞ്ഞു.
വിഷരഹിത ഓണം ലക്ഷ്യമാക്കി പച്ചക്കറി കൃഷി ആരംഭിക്കുന്നതിന് കുറിച്ചിത്താനം ശ്രീകൃഷ്ണ വൊക്കേഷണല്‍ ഹയര്‍ സെക്കന്‍ഡറി സ്‌കൂളിലെ വിദ്യാര്‍ഥികള്‍ക്കും സ്റ്റുഡന്‍സ് പൊലിസ് കേടറ്റുകള്‍ക്കും ഗ്രോബാഗില്‍ തയ്യാറാക്കിയ പച്ചക്കറിതൈകളുടെ വിതരണോദ്ഘാടനവും മന്ത്രി നിര്‍വഹിച്ചു. മരങ്ങാട്ടുപളളി പൊലിസ് സ്റ്റേഷനു സമീപം പ്രവര്‍ത്തനമാരംഭിച്ച ഇക്കോഷോപ്പ് അങ്കണത്തില്‍ ചേര്‍ന്ന ചടങ്ങില്‍ അഡ്വ. മോന്‍സ് ജോസ്ഫ് എം.എല്‍.എ അധ്യക്ഷത വഹിച്ചു. പ്രിന്‍സിപ്പല്‍ അഗ്രികള്‍ച്ചര്‍ സുമ ഫിലിപ്പ് പദ്ധതി വിശദീകരണം നടത്തി.
ഉഴവൂര്‍ ബ്ലോക്ക് പഞ്ചായത്ത് പ്രസിഡന്റ് മോളി ലൂക്കോസ്, ഗ്രാമ- ബ്ലോക്ക് ജനപ്രതിനിധികള്‍, വിവിധ രാഷ്ട്രീയ കക്ഷി പ്രതിനിധികള്‍, കൃഷി ഡെപ്യൂട്ടി ഡയറക്ടര്‍മാരായ ലീലാമ്മ ഉമ്മന്‍, സി. ഗീത, അസി. ഡയറക്ടര്‍ ജോര്‍ജ്ജ് ജോസഫ് എന്നിവര്‍ സംസാരിച്ചു. ഗ്രാമ പഞ്ചായത്ത് പ്രസിഡന്റ് ഡോ. റാണി ജോസഫ് സ്വാഗതവും കൃഷി ഓഫിസര്‍ റീന കുര്യന്‍ നന്ദിയും പറഞ്ഞു. ചടങ്ങിന് മുന്നോടിയായി നടന്ന കാര്‍ഷിക സെമിനാറില്‍ അസി. പ്രൊഫസര്‍ ഡോ. അനു ജി കൃഷ്ണന്‍ ക്ലാസെടുത്തു. കര്‍ഷകരായ പി.എം പൈലി, ഗോപാലകൃഷ്ണന്‍ കാര്‍ഷിക അനുഭവം പങ്കുവച്ചു.