അരീക്കോട്: മൂന്ന് പതിറ്റാണ്ടിലേറെ പഴക്കമുള്ള ഊര്‍ങ്ങാട്ടിരി ശുദ്ധജല വിതരണ പദ്ധതിക്ക് വെള്ളം ശുദ്ധീകരിക്കാനുള്ള സംവിധാനം ഇനിയുമായില്ല. കേരള വാട്ടര്‍ അതോറിറ്റിക്ക് കീഴിലെ പദ്ധതി 1982-87 കാലഘട്ടത്തില്‍ എം.പി ഗംഗാധരന്‍ ജലവിഭവ വകുപ്പ് മന്ത്രിയായിരിക്കെ ആണ് പദ്ധതി ആരംഭിച്ചത്. ചാലിയാറില്‍ നിന്ന് ജലമെടുത്ത് മൈത്ര ഉള്ളുപറമ്പിലുള്ള സംഭരണിയിലെത്തിച്ച് അവിടെ നിന്നാണ് ജലവിതരണം നടത്തുന്നത്.
ഉള്ളുപറമ്പിലുള്ള സംഭരണിക്കടുത്ത് അര ഏക്കറോളം സ്ഥലം വാട്ടര്‍ അതോറിറ്റിക്ക് സ്വന്തമായി ഉണ്ടായിട്ടും ശുദ്ധീകരണ പ്ലാന്റ് സ്ഥാപിക്കാനുള്ള ശ്രമം കാര്യമായി ഉണ്ടായിട്ടില്ല. കഴിഞ്ഞ വര്‍ഷത്തെ ബജറ്റില്‍ ശുദ്ധീകരണ പ്ലാന്റിനായി ഒരു കോടി രൂപ പ്രഖ്യാപിച്ചിട്ടുണ്ടെങ്കിലും ടോക്കണ്‍ തുക മാത്രമാണ് നീക്കി വെച്ചത്.
എന്നാല്‍ രാഷ്ട്രീയ ഭേദം മറന്ന് ഊര്‍ങ്ങാട്ടിരി പഞ്ചായത്ത് ഭരണ സമിതിയും എം.എല്‍.എയും എം.പിയും കൈകോര്‍ത്താല്‍ ബജറ്റില്‍ പ്രഖ്യാപിച്ച പദ്ധതി എന്ന നിലക്ക് നടപ്പാക്കാവുന്നതാണ്. കീഴുപറമ്പ്പഞ്ചായത്തില്‍ ശുദ്ധീകരണ പ്ലാന്റ് നിര്‍മിക്കാന്‍ സ്ഥലമില്ല എന്ന കാരണമാണെങ്കില്‍ ഊര്‍ങ്ങാട്ടിരിയില്‍ അത്തരം ഒരു പ്രശ്‌നവുമില്ല. മൂന്ന് പതിറ്റാണ്ട് മുന്‍പ് 500ല്‍ താഴെ ഗുണഭോക്താക്കള്‍ക്ക് മാത്രമായി ആരംഭിച്ച പദ്ധതിയില്‍ ഇന്ന് ആയിരക്കണക്കിന് കുടുംബങ്ങളാണുള്ളത്. സ്വന്തമായി സ്ഥലമുള്ള പദ്ധതിയായിട്ടും ഒരു ശുദ്ധീകരണ പ്ലാന്റിനായി ഇവിടെ ഒരു ശ്രമവും ഇതു വരെയും കാര്യമായി നടന്നിട്ടില്ല.
ചാലിയാറില്‍ ആല്‍ഗല്‍ ബ്ലൂം പ്രതിഭാസമുണ്ടായപ്പോള്‍ ദിവസങ്ങളോളം ഈ പദ്ധതിയില്‍ ജലവിതരണം നിര്‍ത്തിവച്ചിരുന്നു. ശുദ്ധീകരണ പ്ലാന്റില്ലാത്തത് കൊണ്ടാണ് അന്ന് ജലവിതരണം നിര്‍ത്തി വെക്കേണ്ട അവസ്ഥ വന്നത്. ശുദ്ധീകരണ സംവിധാനം ഒരുക്കണമെന്നാവശ്യപ്പെട്ട് നാട്ടുകാര്‍ രംഗത്തെത്തിയിട്ടുണ്ട്.