ന്യൂഡല്‍ഹി: ഉത്തര്‍പ്രദേശിലെ പ്രധാന നഗരങ്ങളിലൊന്നായ അലഹബാദിന്റെ പേര് പ്രയാഗ്‌രാജ് എന്നാക്കി മാറ്റാനുള്ള മുഖ്യമന്ത്രി യോഗി ആദിത്യനാഥിന്റെ നീക്കത്തിനെതിരേ പ്രതിപക്ഷവും വിദ്യാഭ്യാസ പ്രവര്‍ത്തകരും രംഗത്തുവന്നു. ഇന്ത്യയുടെ ചരിത്രവുമായാണ് പേരുമാറ്റംകൊണ്ട് യോഗി ആദിത്യനാഥ് കളിക്കുന്നതെന്ന് കോണ്‍ഗ്രസ് വക്താവ് ഓംകാര്‍നാഥ് സിങ് പറഞ്ഞു.
പ്രയാഗ്‌രാജ് എന്ന പേരുള്ള ഒരു പ്രദേശം ഇപ്പോള്‍ തന്നെ രാജ്യത്തുണ്ട്. അതിനാല്‍ പുതുതായി ചരിത്രപ്രാധാന്യമുള്ള ഒരു നഗരത്തിന്റെ പേര് മാറ്റേണ്ടതില്ല. അലഹബാദിന്റെ പേരുമാറ്റം രാജ്യത്തെ പൗരന്മാര്‍ക്ക് ഉള്‍ക്കൊള്ളാന്‍ കഴിയില്ലെന്നും അദ്ദേഹം പറഞ്ഞു. ചരിത്രപ്രാധാന്യമുള്ള നഗരങ്ങള്‍ പേരുമാറ്റി അതിന്റെ ക്രെഡിറ്റ് ഏറ്റെടുക്കുകയാണ് യോഗി ആദിത്യനാഥെന്ന് മുന്‍ മുഖ്യമന്ത്രി അഖിലേഷ് യാദവ് കുറ്റപ്പെടുത്തി.
അലഹബാദിന്റെ പഴയ പേര് പ്രയാഗ് എന്നായിരുന്നുവെന്നും 16ാം നൂറ്റാണ്ടില്‍ മുഗള്‍ രാജാവ് അക്ബര്‍ ഗംഗയുടെയും യമുനയുടെയും സംഗമസ്ഥാനത്ത് കോട്ട പണിതതോടെ അതിന് 'ഇലാഹാബാദ് ' എന്ന് പേരിടുകയും ചെയ്യുകയായിരുന്നുവെന്നാണ് നഗരത്തിന്റെ പേരിനെ കുറിച്ചുള്ള ഒരു ചരിത്രം. മുഗള്‍ ചക്രവര്‍ത്തി ഷാജഹാനാണ് പിന്നീട് അലഹബാദ് എന്ന് പേര് മാറ്റിയത്.