ദുബൈ: ആസ്‌ത്രേലിയയും പാകിസ്താനും തമ്മിലുള്ള രണ്ടാം ക്രിക്കറ്റ് ടെസ്റ്റില്‍ ബാറ്റിങ് തകര്‍ച്ച നേരിട്ട പാകിസ്താന്‍ ആസ്‌ത്രേലിയയെ എറിഞ്ഞൊതുക്കുന്നു. രണ്ടാം ടെസ്റ്റിന്റെ ആദ്യ ദിവസം അവസാനിക്കുമ്പോള്‍ പാകിസ്താന്റെ 282 റണ്‍സ് പിന്തുടര്‍ന്ന് ഇറങ്ങിയ ആസ്‌ത്രേലിയ 20 റണ്‍സിന് രണ്ട് വിക്കറ്റ് എന്ന നിലയിലാണ്. ഇരു ടീമുകളും മികച്ച ബൗളിങ് പുറത്തെടുത്തപ്പോള്‍ ആദ്യ ദിനം തന്നെ വീണത് ഇരുടീമുകളിലേയുമായി 12 വിക്കറ്റുകളാണ്. ഉസ്മാന്‍ ഖാജയേയും പീറ്റര്‍ സിഡ്‌ലിനേയുമാണ് ആസ്‌ത്രേലിയക്ക് നഷ്ടമായത്. പാക്ക് ബൗളര്‍ മുഹമ്മദ് അബാസാണ് ആസ്‌ത്രേലിയയുടെ രണ്ട് വിക്കറ്റുകളും വീഴ്ത്തിയത്. 13 റണ്‍സുമായി ആരോണ്‍ ഫിഞ്ചാണ് ക്രീസിലുള്ളത്. നാല് വിക്കറ്റ് വീഴ്ത്തിയ നഥാന്‍ ലിയണാണ് പാകിസ്താന്‍ ബാറ്റിങ്ങിന് തടയിട്ടത്. 57 റണ്‍സിന് അഞ്ച് വിക്കറ്റ് എന്ന നിലയിലായിരുന്ന പാകിസ്താനെ ഫകര്‍സമാനും സര്‍ഫ്രാസ് അഹ്മദും ചേര്‍ന്നാണ് കരകയറ്റിയത്. 94 റണ്‍സ് വീതം നേടിയ ഇരുവരും മികച്ച പ്രകടനം പുറത്തെടുത്തു. ആറാം വിക്കറ്റില്‍ പാകിസ്താന്‍ 147 റണ്‍സ് കൂട്ടിച്ചേര്‍ത്തു. എന്നാല്‍ പിന്നീട് തുടരെ വിക്കറ്റുകള്‍ വീണതോടെ പാകിസ്താന്റെ ഇന്നിങ്‌സ് 282 റണ്‍സിലൊതുങ്ങുകയായിരുന്നു.