തിരുവനന്തപുരം: സിറാജ് തിരുവനന്തപുരം യൂനിറ്റ് മേധാവി കെ.എം ബഷീറിനെ ഐ.എ.എസ് ഉദ്യോഗസ്ഥന്‍ ശ്രീറാം വെങ്കിട്ടരാമന്‍ മദ്യലഹരിയില്‍ വാഹനമോടിച്ച് കൊലപ്പെടുത്തിയ കേസില്‍ പൊലിസ് സമര്‍പ്പിച്ച ഇടക്കാല റിപ്പോര്‍ട്ട് സിറാജ് മാനേജ്‌മെന്റ് തള്ളി. അപകടം സംബന്ധിച്ച് സിറാജ് മാനേജ്‌മെന്റ് പരാതി നല്‍കാന്‍ വൈകിയതാണ് ശ്രിറാം വെങ്കിട്ടരാമന്റെ രക്ത സാംപിള്‍ എടുക്കുന്നത് വൈകാന്‍ കാരണമായതെന്ന റിപ്പോര്‍ട്ടിലെ പരാമര്‍ശം അടിസ്ഥാനരഹിതമാണെന്ന് സിറാജ് തിരുവനന്തപുരം യൂണിറ്റ് ചെയര്‍മാന്‍ എ സൈഫുദ്ദീന്‍ ഹാജി വ്യക്തമാക്കി.

അതിനിടെ, കെ.എം ബഷീറിന്റെ ഫോണ്‍ കാണാതായ സംഭവത്തിലും ദുരൂഹത വര്‍ധിക്കുകയാണ്. കെ.എം ബഷീറിന് രണ്ട് ഫോണുകളാണ് ഉണ്ടായിരുന്നത്. ഒന്ന് സാധാരണ ഫോണും മറ്റൊന്ന് സ്മാര്‍ട്ട് ഫോണുമായിരുന്നു. സാധാരണ ഫോണ്‍ തകര്‍ന്ന നിലയില്‍ അപകടം നടന്നയിടത്തുനിന്ന് കിട്ടി. സ്മാര്‍ട്ട് ഫോണ്‍ ഇതുവരെ കണ്ടെത്താനായിട്ടില്ല. നഷ്ടമായ ഫോണ്‍ ഒരു മണിക്കൂറിനുള്ളില്‍ ആരോ ഉപയോഗിച്ചിട്ടുണ്ടെന്നും അതാരാണെന്ന് കണ്ടെത്തണമെന്നുമാണ് സിറാജ് മാനേജ്‌മെന്റ് ആവശ്യപ്പെടുന്നത്.