ഒര്‍ലാന്‍ഡോ: യു.എസിലെ ഫ്‌ളോറിഡക്കടുത്ത് ഒര്‍ലാന്‍ഡോയിലെ വെടിവയ്പില്‍ അക്രമി ഉള്‍പ്പെടെ ആറു പേര്‍ കൊല്ലപ്പെട്ടു. 45 കാരനായ അക്രമിയെ തിരിച്ചറിഞ്ഞിട്ടില്ലെന്ന് പൊലിസ് അറിയിച്ചു. ബിസിനസ് കേന്ദ്രമായ ഫിയാമ്മയില്‍ തിങ്കളാഴ്ച രാവിലെയായിരുന്നു ആക്രമണം. വാഹന ഭാഗങ്ങള്‍ നിര്‍മിക്കുന്ന കമ്പനികളാണ് ഇവിടെയുള്ളത്. ജോലിസ്ഥലത്തെ ആക്രമണമാണ് നടന്നതെന്നു ഓറഞ്ച് കൗണ്ടി ഷെറിഫ് ജെറി ഡെമിങ് വാര്‍ത്താ സമ്മേളനത്തില്‍ പറഞ്ഞു.
സംഭവത്തില്‍ ഭീകരബന്ധമില്ലെന്നും ജോലിസ്ഥലത്തുണ്ടായ തര്‍ക്കമാണ് ആക്രമണത്തില്‍ കലാശിച്ചതെന്നും അദ്ദേഹം വ്യക്തമാക്കി. ആക്രമണം നടക്കുമ്പോള്‍ സ്ഥാപനത്തില്‍ 12 ജീവനക്കാരാണ് ഉണ്ടായിരുന്നത്. പ്രാദേശിക സമയം രാവിലെ 8.03 നാണ് വെടിവയ്പ്. പൊലിസില്‍ വിവരമറിയിച്ച് രണ്ടു മിനുട്ടിനുള്ളില്‍ പൊലിസ് സ്ഥലത്തെത്തി. ഇതിനിടെ ഒന്നിലേറെ പേര്‍ക്ക് വെടിയേറ്റിരുന്നു.
അക്രമി സ്വയംവെടിവച്ച് മരിക്കുകയായിരുന്നുവെന്ന് പൊലിസ് പറഞ്ഞു. തോക്കും കത്തിയും ഇയാള്‍ കരുതിയിരുന്നു. എന്നാല്‍ കത്തി ആക്രമണത്തിന് ഉപയോഗിച്ചില്ലെന്ന് പൊലിസ് പറഞ്ഞു. കഞ്ചാവു കേസില്‍ നേരത്തെ പിടിക്കപ്പെട്ടയാളാണ് പ്രതി. ഒര്‍ലാന്‍ഡോയിലെ നിശാക്ലബില്‍ കഴിഞ്ഞ വര്‍ഷമുണ്ടായ വെടിവയ്പിനെ തുടര്‍ന്ന് 49 പേര്‍ കൊല്ലപ്പെട്ടിരുന്നു. ഇതിന്റെ വാര്‍ഷികത്തിലാണ് വീണ്ടും ആക്രമണമുണ്ടായത്.