കൊല്ലം: മന്ത്രി മേഴ്സിക്കുട്ടിയമ്മയുടെ വാഹനം ഗതാഗതക്കുരുക്കില്‍ അകപ്പെട്ട സംഭവത്തില്‍ സസ്പെന്‍ഡ് ചെയ്ത മൂന്നു പൊലിസുകാരെയും തിരിച്ചെടുത്തു. എന്നാല്‍ ഇവരെ സ്ഥലം മാറ്റിയിട്ടുണ്ട്. ശൂരനാട് പൊലിസ് സ്റ്റേഷനിലെ സീനിയര്‍ സി.പി.ഒ ഹരിലാല്‍, സി.പി.ഒ രാജേഷ്, റൂറല്‍ പൊലിസ് സ്പെഷ്യല്‍ ബ്രാഞ്ച് എ.എസ്.ഐ നുക്യുദീന്‍ എന്നിവരെയാണ് ഗുരുതര സുരക്ഷാ വീഴ്ച ആരോപിച്ച് കഴിഞ്ഞയാഴ്ച റൂറല്‍ എസ്.പി സസ്പെന്‍ഡ് ചെയ്തത്.

കഴിഞ്ഞദിവസം സസ്പെന്‍ഡ് ചെയ്ത കൊല്ലം എ.ആര്‍ ക്യാമ്പില്‍ നിന്നുള്ള പൊലിസുകാരന്റെ സസ്പെന്‍ഷന്‍ പിന്‍വലിക്കേണ്ടത് കൊല്ലം സിറ്റിപൊലിസ് കമ്മിഷണറായതിനാല്‍ അതും ഉടനുണ്ടായേക്കുമെന്നാണ് അറിയുന്നത്. കഴിഞ്ഞ ആഴ്ചയായിരുന്നു പത്തനംതിട്ടയില്‍ സ്വാതന്ത്ര്യദിനാഘോഷം കഴിഞ്ഞ് മടങ്ങുകയായിരുന്ന മന്ത്രിയുടെയും ശൂരനാട്ടെ ദുരിതാശ്വാസ ക്യാമ്പുകളില്‍ സന്ദര്‍ശനത്തിന് എത്തിയ എസ്.പി ആര്‍. ഹരിശങ്കറിന്റെയും വാഹനങ്ങള്‍ വിവാഹ ഓഡിറ്റോറിയത്തിനു മുന്നിലെ തിരക്കില്‍ 10 മിനിറ്റോളം കുടുങ്ങിക്കിടന്നതിനായിരുന്നു ഇവരെ സസ്പെന്‍ഡ് ചെയ്തത്.

വാഹനം കടന്നുപോകുന്ന കാര്യം മുന്‍കൂട്ടി അറിയിച്ചിട്ടും വേണ്ട സൗകര്യം ഒരുക്കിയില്ലെന്ന് കണ്ടെത്തിയാണ് നടപടിയെന്നായിരുന്നു സസ്പെന്‍ഷനെക്കുറിച്ചുള്ള ഔദ്യോഗിക വിശദീകരണം. എന്നാല്‍ മന്ത്രിയുടെ പെട്ടെന്നുള്ള സന്ദര്‍ശനം അറിഞ്ഞ് പൊലിസ് എത്തിയപ്പോഴേക്കും മന്ത്രിയുടെ വാഹനം ഗതാഗതക്കുരുക്കില്‍ അകപ്പെട്ടിരുന്നു. ഇടതു അനുകൂല സംഘടനാ പ്രവര്‍ത്തകരായ പൊലിസുകാര്‍ക്ക് സസ്പെന്‍ഷന്‍ ലഭിച്ചത് പൊലിസിനുള്ളിലും അമര്‍ഷത്തിന് കാരണമായിരുന്നു.