ന്യൂഡല്‍ഹി: എനിക്കെന്റെ അഭിപ്രായ സ്വാതന്ത്ര്യം തിരികെ വേണമെന്നും അര ദിവസമെങ്കിലും എനിക്ക് ഞാനായി ജീവിക്കണമെന്നും കണ്ണന്‍ ഗോപിനാഥന്‍. ലോകത്തെ ഏറ്റവും വലിയ ജനാധിപത്യ രാജ്യത്തെ ഒരു സംസ്ഥാനത്ത് മുഴുവന്‍ നിരോധനാജ്ഞ പ്രഖ്യാപിച്ചപ്പോള്‍, ഒരു ജനതയുടെ മുഴുവന്‍ മൗലികാവകാശങ്ങളും ലംഘിക്കപ്പെട്ടപ്പോള്‍ നിങ്ങള്‍ എന്തു ചെയ്യുകയായിരുന്നു എന്ന് നാളെ ആരെങ്കിലും ചോദിച്ചാല്‍, ഞാനെന്റെ ജോലി രാജിവച്ചു എന്നെങ്കിലും മറുപടി നല്‍കാന്‍ എനിക്ക് കഴിയണം- രാജി പ്രഖ്യാപന ശേഷം ഇന്ത്യന്‍ എക്‌സ്പ്രസുമായി സംസാരിക്കുകയായിരുന്നു കണ്ണന്‍.
ശബ്ദമില്ലാത്തവര്‍ക്ക് ശബ്ദം നല്‍കാനാകും എന്ന പ്രതീക്ഷയോടെയാണ് സിവില്‍ സര്‍വിസില്‍ ചേര്‍ന്നത്. എന്നാല്‍ ഇവിടെ എനിക്ക് എന്റെ ശബ്ദം നഷ്ടമായി. രാജികൊണ്ട് പ്രത്യേകിച്ച് എന്തെങ്കിലും മാറ്റം ഉണ്ടാകുമെന്ന് തോന്നുന്നില്ല. ഒരു സംവിധാനത്തെ തിരുത്തേണ്ടത് അതിനുള്ളില്‍ നിന്നുകൊണ്ടാണെന്ന് പറയാറുണ്ട്. തിരുത്താന്‍ കുറേ ശ്രമിച്ചു. ഈ സംവിധാനത്തില്‍ നിന്ന് ഇതിനെ തിരുത്താനാകുമെന്ന് പ്രതീക്ഷയില്ല. ഭാര്യയ്ക്ക് ജോലിയുണ്ട്. അവരുടെ പിന്തുണ കൊണ്ടാണ് സര്‍വിസില്‍ നിന്നും രാജിവച്ചത്.
ജമ്മു കശ്മിരിലേത് അടിയന്തരാവസ്ഥയ്ക്ക് സമാനമായ സാഹചര്യമാണ്. 19 ദിവസമായി ഒരു സംസ്ഥാനത്ത് മൗലികാവകാശങ്ങള്‍ ഇല്ലാതായിട്ട്. കോടതിയില്‍ പോലും നീതി കിട്ടാത്ത അവസ്ഥയാണെന്നും കണ്ണന്‍ പറഞ്ഞു.