ബിര്‍മിങ്ഹാം: പാകിസ്താനെതിരായ ഐ.സി.സി ചാംപ്യന്‍സ് ട്രോഫി പോരാട്ടത്തില്‍ ദക്ഷിണാഫ്രിക്ക 50 ഓവറില്‍ എട്ട് വിക്കറ്റ് നഷ്ടത്തില്‍ 219 റണ്‍സെടുത്തു. ടോസ് നേടി ബാറ്റിങ് തിരഞ്ഞെടുത്ത ദക്ഷിണാഫ്രിക്കയുടെ തീരുമാനം പാളി. മികച്ച ബൗളിങുമായി പാക് താരങ്ങള്‍ കളം നിറഞ്ഞതോടെ ദക്ഷിണാഫ്രിക്കന്‍ ബാറ്റ്‌സ്മാന്‍മാര്‍ റണ്‍സെടുക്കാന്‍ പാടുപ്പെട്ടു. മധ്യനിര താരം ഡേവിഡ് മില്ലറിന്റെ ഒറ്റയാള്‍ പോരാട്ടമാണ് ദക്ഷിണാഫ്രിക്കന്‍ സ്‌കോര്‍ 200 കടത്തിയത്.
ബാറ്റിങിനിറങ്ങിയ ദക്ഷിണാഫ്രിക്ക ഭേദപ്പെട്ട തുടക്കമിട്ടെങ്കിലും പിന്നീട് വിക്കറ്റുകള്‍ കൊഴിഞ്ഞത് തിരിച്ചടിയായി. ക്വിന്റന്‍ ഡി കോക്ക് 33 റണ്‍സെടുത്തപ്പോള്‍ അംല (16), ഡു പ്ലെസിസ് (26) എന്നിവര്‍ പിടിച്ചു നില്‍ക്കാനുള്ള ശ്രമം നടത്തുന്നതിനിടെ വീണു. പിന്നാലെയെത്തിയ ഡിവില്ല്യേഴ്‌സ് ആദ്യ പന്തില്‍ തന്നെ സംപൂജ്യനായി കൂടാരം കയറിയത് അവര്‍ക്ക് തിരിച്ചടിയായി. അഞ്ചാമനായി ക്രീസിലെത്തിയ ഡേവിഡ് മില്ലര്‍ പുറത്താകാതെ ഒരറ്റം കാത്തു. മറുഭാഗത്ത് വിക്കറ്റുകള്‍ കൊഴിഞ്ഞത് അവരുടെ സ്‌കോറിങിനെ ബാധിച്ചു. വാലറ്റത്ത് ക്രിസ് മോറിസ് (28), റബാഡ (26) എന്നിവരും ചെറുത്തുനിന്നു. മില്ലര്‍ 104 പന്തില്‍ ഒരു ഫോറും മൂന്ന് സിക്‌സുമടക്കം 75 റണ്‍സ് കണ്ടെത്തി.
ഇന്ത്യക്കെതിരേ പൊതിരെ തല്ല് വാങ്ങിയ പാക് ബൗളര്‍മാര്‍ ഇത്തവണ മികച്ച പ്രകടനം പുറത്തെടുത്തു. മീഡിയം പേസര്‍ ഹസന്‍ അലി എട്ടോവറില്‍ 24 റണ്‍സിന് മൂന്ന് വിക്കറ്റെടുത്തു. ജുനൈദ് ഖാന്‍, ഇമദ് വാസിം എന്നിവര്‍ രണ്ടും മുഹമ്മദ് ഹഫീസ് ഒരു വിക്കറ്റുമെടുത്തു. ദക്ഷിണാഫ്രിക്ക ജയിച്ചാല്‍ അവര്‍ക്ക് സെമിയുറപ്പിക്കാം. സെമി പ്രതീക്ഷ നിലനിര്‍ത്താന്‍ പാകിസ്താന് ജയം അനിവാര്യമാണ്.