കോഴിക്കോട്: മലബാറിന്റെ ചരിത്രത്തിലെ ഏറ്റവും ധീരമായ പോരാട്ടത്തിന്റെ ചിത്രമാണ് കുഞ്ഞാലി മരക്കാന്‍മാര്‍ കാഴ്ചവെച്ചതെന്ന് ഫാറൂഖ്‌കോളജ് ചരിത്ര വിഭാഗം മേധാവി പ്രൊഫസര്‍ പി. മുഹമ്മദലി പറഞ്ഞു.
ഭാഷാ ഇന്‍സ്റ്റിറ്റ്യൂട്ട് പ്രദേശിക കേന്ദ്രവും കുഞ്ഞാലി മരക്കാര്‍ റിസേര്‍ച്ച് ഫൗണ്ടേഷനും സംയുക്തമായി സംഘടിപ്പിച്ച കുഞ്ഞാലി മരക്കാര്‍ അനുസ്മരണ പരിപാടിയില്‍ പ്രഭാഷണം നടത്തുകയായിരുന്നു അദ്ദേഹം.
വൈദേശിക കോളനിവല്‍കരണത്തിനെതിരേ സാഹസിക ജീവിതവും സമരോത്സുകമായ പോരാട്ടവും നടത്തിയവരാണവര്‍. ചെറൂട്ടി റോഡിലെ എന്‍.വി കൃഷ്ണവാര്യര്‍ ഹാളില്‍ നടന്ന ചടങ്ങില്‍ ഭാഷാ ഇന്‍സ്റ്റിറ്റ്യൂട്ട് അസിസ്റ്റന്റ് ഡയരക്ടര്‍ എന്‍. ജയകൃഷ്ണന്‍ അധ്യക്ഷനായി. കുഞ്ഞാലി മരക്കാര്‍ റിസര്‍ച്ച് ഫൗണ്ടേഷന്‍ കേരള ജനറല്‍ സെക്രട്ടറി പി.കെ അസീസ് മാസ്റ്റര്‍, പക്കര്‍ പന്നൂര്‍, എം.പി ബീന, വി. അനീഷ് പ്രസംഗിച്ചു.
ചടങ്ങില്‍ ദാദാഭായ് നവറോജി അവാര്‍ഡ് ജേതാവ് ആറ്റക്കോയ പള്ളിക്കണ്ടിക്കുള്ള ഉപഹാരം കുഞ്ഞാലി മരക്കാര്‍ റിസര്‍ച്ച് ഫൗണ്ടേഷന്‍ പ്രസിഡന്റ് എവറസ്റ്റ് ഹനീഫ നല്‍കി.