വേങ്ങര: യുവതിയുടെ കഴുത്തില്‍നിന്നു അഞ്ചു പവന്റെ സ്വര്‍ണമാല പൊട്ടിച്ചോടിയ സ്ത്രീയെ നാട്ടുകാര്‍ പിടികൂടി പൊലീസിലേല്‍പ്പിച്ചു.
വലിയോറ പരപ്പില്‍പാറ ചെള്ളി അഹമ്മദ് കുട്ടിയുടെ മകന്‍ റജുലിന്റെ ഭാര്യയുടെ കഴുത്തിലണിഞ്ഞ മാലയാണ് യാചനക്കായെത്തിയ സ്ത്രീ പൊട്ടിച്ചത്. ഇന്നലെ ഉച്ചക്ക് ഒന്നോടെ അഹമ്മദ് കുട്ടിയുടെ വീടിലെത്തിയ 60 വയസ് പ്രായം തോന്നിക്കുന്ന സ്ത്രീയാണ് കവര്‍ച്ചാ ശ്രമം നടത്തിയത്. ആശുപത്രിയിലായിരുന്ന വീട്ടുടമയുടെ മാതാവിന്റെ അടുത്തുനിന്നു കല്യാണത്തിനു പങ്കെടുക്കാന്‍ വീട്ടിലേക്കു മടങ്ങിയതായിരുന്നു റജുലും ഭാര്യയും.
ഭാര്യയെ വീട്ടിലിറക്കി കല്യാണത്തിനു പോയ സമയത്താണ് യാചക വീട്ടിലെത്തിയത്. ഇവര്‍ക്ക് യുവതി 10 രൂപ നല്‍കിയിട്ടും പോകാതിരുന്നപ്പോള്‍ 100 രൂപയും നല്‍കി. ഈ സമയത്ത് യുവതിയുടെ കഴുത്തിലണിഞ്ഞ മാല പൊട്ടിക്കുകയായിരുന്നു.
യുവതി ബഹളംവച്ചതിനെ തുടര്‍ന്ന് ഓടി കൂടിയ നാട്ടുകാര്‍ സ്ത്രീയെ പിന്‍തുടര്‍ന്ന് പിടികൂടി മാല കണ്ടെടുക്കുകയും സ്ത്രീയെ വേങ്ങര പൊലിസിലേല്‍പിക്കുകയും ചെയ്തു.