ഹരിപ്പാട്: ഒന്‍പതാം ക്ലാസുകാരി പെണ്‍കുട്ടിയെ പ്രേമം നടിച്ചു വശത്താക്കി സ്വര്‍ണം തട്ടിയെടുത്ത കേസില്‍ രണ്ടു പേര്‍ പിടിയിലായി. മണ്ണാറശ്ശാല രാമനേത്ത് വീട്ടില്‍ അനന്തു (20),ചെറുതന തൈപ്പറമ്പില്‍ ശരത് (24) എന്നിവരാണ് പിടിയിലായത്.
പെണ്‍കുട്ടിയുമായി പരിചയത്തിലായ അനന്തു പ്രേമം നടിച്ച് പെണ്‍കുട്ടിയെ വശത്താക്കുകയും തന്ത്രപൂര്‍വ്വം ചിത്രം മൊബൈലില്‍ പകര്‍ത്തുകയും ചെയ്തു. ഈ ചിത്രം മോര്‍ഫ് ചെയ്തിട്ട് സമൂഹ മാധ്യമങ്ങളില്‍ പ്രചരിപ്പിക്കുമെന്ന് പറഞ്ഞ് ഭീഷണിപ്പെടുത്തി 70 ഗ്രാം (എട്ടര പവന്‍) സ്വര്‍ണം കൈക്കലാക്കുകയായിരുന്നു. ഒരു ഓപ്പറേഷനെ തുടര്‍ന്ന് പെണ്‍കുട്ടിയുടെ മാതാവിന്റെ സ്വര്‍ണാഭരണങ്ങള്‍ പെണ്‍കുട്ടിയുടെ മുത്തശ്ശനെ ഏല്‍പിച്ചിരിക്കുകയായിരുന്നു. മാതാവിന്റെ വീട്ടില്‍ നിന്ന് പഠിക്കുകയായിരുന്ന പെണ്‍കുട്ടി അനന്തുവിന്റെ നിരന്തര ഭീഷണിയെ തുടര്‍ന്ന് വീട്ടുകാരറിയാതെ അലമാരയില്‍ സൂക്ഷിച്ചിരുന്ന സ്വര്‍ണമെടുത്ത് കൊടുക്കുകയായിരുന്നു.
അടുത്തിടെ പണത്തിന് ആവശ്യം വന്നപ്പോള്‍ പണയം വയ്ക്കുവാനായി സ്വര്‍ണം അന്വേഷിച്ചപ്പോള്‍ കാണാതെ വരികയും മോഷണം പോയതായി കരുതുകയും ചെയ്തിരുന്നു. കഴിഞ്ഞ ദിവസം പ്രതികള്‍ തമ്മില്‍ വഴക്കുണ്ടാവുകയും പിണങ്ങുകയും ചെയ്തു. ഇതിനെ തുടര്‍ന്ന് ശരത് പെണ്‍കുട്ടിയുടെ വീട്ടിലെത്തി വിവരങ്ങള്‍ ധരിപ്പിക്കുകയായിരുന്നു. പെണ്‍കുട്ടിയുടെ ബന്ധുക്കള്‍ ഹരിപ്പാട് പൊലിസില്‍ നല്‍കിയ പരാതിയെ തുടര്‍ന്ന് നടത്തിയ അന്വേഷണത്തിലാണ് പ്രതികള്‍ പിടിയിലായത്.