ഭിവാനി: കേന്ദ്രത്തിനും പ്രധാനമന്ത്രിയുടെ ഓഫിസിനുമെതിരേ ആരോപണവുമായി ബി.ജെ.പി എം.പിയും മേനകാ ഗാന്ധിയുടെ മകനുമായ വരുണ്‍ ഗാന്ധി. എം.പിമാര്‍ക്കു ശമ്പളം വര്‍ധിപ്പിച്ചതു ചോദ്യംചെയ്ത തന്നോട്, എന്തിനാണ് സര്‍ക്കാരിനെ കൂടുതല്‍ പ്രതിസന്ധിയിലാക്കുന്നതെന്നാണ് പ്രധാനമന്ത്രിയുടെ ഓഫിസ് ചോദിച്ചതെന്ന് അദ്ദേഹം ആരോപിച്ചു. ഹരിയാനയിലെ ഭിവാനിയില്‍ ഒരു വനിതാ കോളജില്‍ നടന്ന പരിപാടിയില്‍ സംസാരിക്കുമ്പോഴായിരുന്നു വരുണിന്റെ വെളിപ്പെടുത്തല്‍.
എം.പിമാരുടെ സ്വത്തുവിവരങ്ങളെക്കുറിച്ച് അന്വേഷണം നടത്തിയ ശേഷമേ അവര്‍ക്കു ശമ്പളം വര്‍ധിപ്പിക്കാവൂവെന്നു താന്‍ നിരന്തരം പറയുന്നതാണ്. കഠിനാധ്വാനം ചെയ്യുന്ന തൊഴിലാളികള്‍ക്കെല്ലാം അവരുടെ ജോലിയുടെ പ്രധാന്യം തിരിച്ചറിഞ്ഞു വേതനം വര്‍ധിപ്പിക്കണം.
എന്നാല്‍, എം.പിമാര്‍ക്ക് അവരുടെ സാമ്പത്തിക സ്ഥിതി നോക്കാതെ പത്തു വര്‍ഷത്തിനുള്ളില്‍ ഏഴു തവണയാണ് ശമ്പളം വര്‍ധിപ്പിച്ചത്. ഇക്കാര്യം ഉന്നയിച്ചപ്പോഴായിരുന്നു പ്രധാനമന്ത്രിയുടെ ഓഫിസിന്റെ ചോദ്യമെന്നും അദ്ദേഹം പറഞ്ഞു.
ഉത്തര്‍പ്രദേശില്‍ ഓരോ വര്‍ഷവും മൂന്നു ലക്ഷം കോടിയാണ് വിദ്യാഭ്യാസത്തിനായി ചെലവഴിക്കുന്നത്. എന്നാല്‍, ഇതില്‍ 98 ശതമാനവും ചെലവഴിക്കുന്നതു കെട്ടിട നിര്‍മാണങ്ങള്‍ക്കാണ്. ഇതിനെ വിദ്യാഭ്യാസ പരിഷ്‌കരണമെന്നു പറയാന്‍ കഴിയുമോയെന്നും യു.പിയിലെ സുല്‍ത്താന്‍പൂര്‍ എം.പികൂടിയായ വരുണ്‍ ചോദിച്ചു. രാജ്യത്തെ 40 ശതമാനം കര്‍ഷകരും കൃഷിക്കായി ഭൂമി പാട്ടത്തിനെടുക്കുകയാണ്.
ഇതു നിയമവിരുദ്ധമായതുകൊണ്ട് ഇവര്‍ക്ക് എന്തെങ്കിലും സഹായം നല്‍കാന്‍ സര്‍ക്കാരിനു കഴിയില്ല. കഴിഞ്ഞ പത്തു വര്‍ഷത്തില്‍ കര്‍ഷകരുടെ ഉല്‍പാദനച്ചെലവ് മൂന്നിലൊന്നു വര്‍ധിച്ചിട്ടുണ്ട്. ഇതു വലിയ പ്രതിസന്ധിയാണുണ്ടാക്കുന്നത്. വിദര്‍ഭയില്‍ മാത്രം 17,000 കര്‍ഷകരാണ് ആത്മഹത്യ ചെയ്തതെന്നും വരുണ്‍ ഗാന്ധി കൂട്ടിച്ചേര്‍ത്തു.