തളിപ്പറമ്പ്: കാരുണ്യം വര്‍ഷിച്ച് തളിപ്പറമ്പ സി.എച്ച് സെന്റര്‍ ഏഴാംവയിസിലേക്ക്. പരിയാരം മെഡിക്കല്‍ കോളജ് കേന്ദ്രീകരിച്ച് പ്രവര്‍ത്തിക്കുന്ന സി.എച്ച് സെന്ററില്‍ പതിനാല് യന്ത്രങ്ങള്‍ കൊണ്ട് ദിനംപ്രതി 28 വൃക്കരോഗികള്‍ക്ക് സൗജന്യമായി ഡയാലിസിസ് ചെയ്ത് നല്‍കുന്നു. ഒരു വര്‍ഷത്തിനിടെ 8,270 ഡയാലിസിസുകളാണ് സി.എച്ച് സെന്ററില്‍ നടന്നത്.
കാസര്‍കോട് മുതല്‍ മാഹിവരെയും വയനാട്ടില്‍ നിന്നുമായി അപകടത്തില്‍ ജീവന്‍ നഷ്ടപ്പെട്ട് പരിയാരം മെഡിക്കല്‍ കോളജിലെത്തുന്ന മയ്യത്തുകള്‍ സൗജന്യമായി സി.എച്ച് സെന്ററില്‍ കുളിപ്പിച്ച് പരിപാലിക്കുന്നുണ്ട്. നിര്‍ധന രോഗികള്‍ക്ക് സൗജന്യ മരുന്ന് വിതരണം, മെഡിക്കല്‍ കോളജിലെയും മറ്റ് ആശുപത്രികളിലെയും രോഗികള്‍ക്കും കൂട്ടിരിപ്പുകാര്‍ക്കും നോമ്പുതുറ വിഭവങ്ങളുടെ വിതരണം, മിതമായ നിരക്കില്‍ ആംബുലന്‍സുകളുടെ സേവനം, രക്തദാന സേന, തളിപ്പറമ്പ് നഗരസഭയുടെ സഹകരണത്തോടെ പെയിന്‍ ആന്റ് പാലിയേറ്റീവ് കെയര്‍ എന്നിവയും സി.എച്ച് സെന്ററിന്റെ ഭാഗമായിട്ടുണ്ട്. കൂടാതെ തളിപ്പറമ്പില്‍ കാരുണ്യ ഫാര്‍മസി തുറക്കാനുള്ള തയാറെടുപ്പിലുമാണ്.
ഫണ്ട് സമാഹരണത്തിന്റെ ഭാഗമായി 12 മുതല്‍ 15 വരെ സയ്യിദ് നഗറില്‍ കാരുണ്യസംഗമം നടത്തും. പ്രമുഖ വാഗ്മികങ്ങളായ മുസ്തഫ ഹുദവി ആക്കോട്, ഇബ്രാഹിം ഖലീല്‍ ഹുദവി കാസര്‍കോട്, സിറാജുദ്ദീന്‍ ദാരിമി കക്കാട് എന്നിവര്‍ പ്രഭാഷണം നടത്തും. 17ന് ഏമ്പേറ്റിലെ സി.എച്ച് സെന്റര്‍ ഓഡിറ്റോറിയത്തില്‍ വനിതാ സംഗമവും ആരോഗ്യ ബോധവല്‍ക്കരണ ക്ലാസും നടക്കും. രേഷ്മ മധു ക്ലാസെടുക്കും. സി.എച്ച് സെന്റര്‍ കുവൈത്ത് ചാപ്റ്റര്‍ തയാറാക്കിയ സി.എച്ച് സെന്ററിനെ കുറിച്ചുള്ള ഡോക്യുമെന്ററി പ്രകാശനവും പ്രദര്‍ശനവും ഇതോടനുബന്ധിച്ച് നടക്കും. വാര്‍ത്താസമ്മേളനത്തില്‍ അബ്ദുല്‍കരീം ചേലേരി, മഹമ്മൂദ് അള്ളാംകുളം, എസ്. മുഹമ്മദ്, കെ. മുസ്തഫ ഹാജി, കെ.കെ.പി ഉമ്മര്‍കുട്ടി പങ്കെടുത്തു.