മുക്കം: നഗരസഭയിലെ മാമ്പറ്റയില്‍ ജല അതോറിറ്റിയുടെ പമ്പ് ഹൗസ് സ്വകാര്യ വാഹനമിടിച്ച് തകര്‍ന്നു. മുക്കം-കുറ്റിപ്പാല മാമ്പറ്റ ബൈപാസിലെ ജല അതോറിറ്റിയുടെ പമ്പ് ഹൗസാണ് തകര്‍ന്നത്.
 പമ്പ് ഹൗസ് തകര്‍ന്നതിനെ തുടര്‍ന്ന് മെയിന്‍ വാല്‍വ്, സ്റ്റാര്‍ട്ടര്‍ എന്നിവ നശിച്ചിരിക്കുകയാണ്. ഇതേതുടര്‍ന്ന് മാമ്പറ്റ മേഖലയില്‍ രണ്ടാഴ്ചയോളമായി ശുദ്ധജല വിതരണം മുടങ്ങിക്കിടക്കുകയാണ്. നിരവധി കുടുംബങ്ങളാണ് ആവശ്യത്തിന് ശുദ്ധജലം കിട്ടാതെ വലയുന്നത്. ജല അതോറിറ്റി അധികൃതരെ വിവരമറിയിച്ചിട്ടും ഇതുവരെ യാതൊരു നടപടിയും ഉണ്ടായിട്ടില്ലെന്ന് നാട്ടുകാര്‍ പറഞ്ഞു.
 പ്രദേശത്തെ കിണറില്ലാത്ത നിരവധി കുടുംബങ്ങള്‍ ജല അതോറിറ്റിയെയാണ് അശ്രയിക്കുന്നത്. മാമ്പറ്റക്ക് പുറമേ വെസ്റ്റ് മാമ്പറ്റ, അഗസ്ത്യമുഴി, ഡോണ്‍ബോസ്  കോളജ് എന്നിവിടങ്ങളിലേക്കുള്ള ജല വിതരണവും മുടങ്ങിയിരിക്കുകയാണ്. തകര്‍ന്ന പമ്പ് ഹൗസ് റിപ്പയര്‍ ചെയ്യുന്നതിനാവശ്യമായ ഭീമമായ ചെലവ് വാഹന ഉടമയില്‍നിന്ന് തന്നെ ഈടാക്കുന്നതിനുള്ള കാലതാമസമാണ് പ്രശ്‌നപരിഹാരം നീളാന്‍ കാരണമെന്നാണ് വാട്ടര്‍ അതോറിറ്റി അധികൃതര്‍ പറയുന്നത്.