കോര്‍പറേഷന്‍ ഭരണം യു.ഡി.എഫിന്

കണ്ണൂര്‍: കോര്‍പറേഷന്‍ മേയറായി കെ.പി.സി.സി ജനറല്‍ സെക്രട്ടറി സുമാ ബാലകൃഷ്ണനെ തെരഞ്ഞെടുത്തു. മുന്‍ മേയറും എല്‍.ഡി.എഫ് സ്ഥാനാര്‍ഥിയുമായ ഇ.പി ലതയെ 25നെതിരേ 28 വോട്ടുകള്‍ക്കാണ് സുമാ ബാലകൃഷ്ണന്‍ പരാജയപ്പെടുത്തിയത്. എല്‍.ഡി.എഫിലെ ഒരു കൗണ്‍സിലറുടെ വോട്ട് അസാധുവായി. യു.ഡി.എഫില്‍ തിരിച്ചെത്തിയ ഡെപ്യൂട്ടി മേയര്‍ പി.കെ രാഗേഷിനെതിരേ എല്‍.ഡി.എഫ് കഴിഞ്ഞദിവസം അവതരിപ്പിച്ച അവിശ്വാസം പരാജയപ്പെട്ടിരുന്നു. മേയര്‍ പദവി കൂടി ലഭിച്ചതോടെ കണ്ണൂര്‍ കോര്‍പറേഷന്‍ ഇനി യു.ഡി.എഫ് ഭരിക്കും.
നിലവില്‍ അഞ്ച് സ്റ്റാന്‍ഡിങ് കമ്മിറ്റികളില്‍ നാലെണ്ണം യു.ഡി.എഫിന്റെയും ഒന്ന് എല്‍.ഡി.എഫിന്റെയും കൈയിലാണ്. വലിയ ഭീഷണിയില്ലാതെ യു.ഡി.എഫിന് തുടര്‍ഭരണം സാധ്യമാകും. കോര്‍പറേഷന്റെ ഭരണ കാലാവധി അവസാനിക്കാന്‍ ഒരുവര്‍ഷം മാത്രം ബാക്കിനില്‍ക്കെയാണ് കൈവിട്ടുപോയ മേയര്‍ സ്ഥാനം യു.ഡി.എഫ് തിരിച്ചുപിടിച്ചത്. 55 അംഗ കൗണ്‍സിലില്‍ 28 പേരാണ് യു.ഡി.എഫ് പക്ഷത്തുള്ളത്. ഒരു കൗണ്‍സിലറുടെ മരണത്തോടെ 26 ആയി എല്‍.ഡി.എഫിന്റെ അംഗബലം. 16ാം വാര്‍ഡ് അംഗം കെ. റോജയുടെ വോട്ട് അസാധുവായതോടെയാണ് എല്‍.ഡി.എഫ് വോട്ട് 25 ആയി കുറഞ്ഞത്. ആദ്യത്തെ ആറുമാസം കോണ്‍ഗ്രസും അതുകഴിഞ്ഞാല്‍ മുസ്‌ലിംലീഗും മേയര്‍ സ്ഥാനം പങ്കിടാനാണ് യു.ഡി.എഫിലെ ധാരണ.