യോണ്ടെ (കാമറൂണ്‍): കാമറൂന്‍ ഇതിഹാസ താരവും ബാഴ്‌സലോണന്‍ സ്‌ട്രൈക്കറുമായ സാമുവല്‍ എറ്റു ഫുട്‌ബോളില്‍നിന്ന് വിരമിച്ചു. തന്റെ 38ാം വയസിലാണ് താരം ബൂട്ടഴിക്കുന്നത്. 22 വര്‍ഷം നീണ്ട ഫുട്‌ബോള്‍ കരിയറിനാണ് നാല് തവണ ആഫ്രിക്കയുടെ മികച്ച താരമായ എറ്റു ഇതോടെ വിരാമമിടുന്നത്. പുതിയ വെല്ലുവിളിയിലേക്കുള്ള ഒടുക്കം എന്ന ഇന്‍സ്റ്റഗ്രാമിലെ കുറിപ്പോടെയാണ് മുന്‍ റയല്‍ മഡ്രിഡ്, ഇന്റര്‍ മിലാന്‍, ചെല്‍സി മുന്നേറ്റതാരം കൂടിയായ താരം വിരമിക്കല്‍ പ്രഖ്യാപിച്ചത്.
2004-2009 സീസണിലാണ് താരം ബാഴ്‌സയുടെ ജഴ്‌സി അണിഞ്ഞത്. കഴിഞ്ഞവര്‍ഷം അദ്ദേഹം ഖത്തര്‍ എസ്.സിയില്‍ ചേര്‍ന്നിരുന്നു. പതിമൂന്ന് ക്ലബുകള്‍ക്കായി എറ്റു കളിച്ചിട്ടുണ്ട്. കാമറൂണ്‍ ദേശീയ ടീമിനായി 118 മത്സരങ്ങള്‍ കളിച്ച എറ്റു 56 ഗോളുകള്‍ നേടിയിട്ടുണ്ട്. ഏറ്റവും മികച്ച ആഫ്രിക്കന്‍ താരങ്ങളുടെ പട്ടികയില്‍ ഒന്നാംനിരക്കാരനാണ്.