ഇടുക്കി: അടിമാലിയില്‍ ആദിവാസി ദമ്പതികളുടെ നവജാത ശിശു മരിച്ചതില്‍ ആരോഗ്യവകുപ്പിനെതിരേ ആദിവാസി സംഘടനകള്‍. അടിമാലി താലൂക്ക് ആശുപത്രിയില്‍ ഉണ്ടായ ചികിത്സയിലെ വീഴ്ചയാണ് മരണത്തിനു കാരണമെന്നാണ് പരാതി. ആശുപത്രിയിലെ ഗൈനക്കോളജി ഡോക്ടര്‍ക്കെതിരേ പൊലിസ് കേസെടുത്തിട്ടുണ്ട്. അടിമാലി കുറത്തിക്കുടി സ്വദേശികളായ ആശ-ഷിബു ദമ്പതികളുടെ കുഞ്ഞാണ് കഴിഞ്ഞ 16ന് മരണപ്പെട്ടത്. 

ആശ പൂര്‍ണ ഗര്‍ഭിണിയായിരിക്കെ താലൂക്ക് ആശുപത്രിയില്‍ എത്തിയിരുന്നു. ആശുപത്രി അധികൃതര്‍ വേണ്ടത്ര പരിചരണം നല്‍കാതെ മടക്കി അയക്കുകയായിരുന്നു. അതേ ദിവസം വീണ്ടും ആശുപത്രിയെലെത്തിയപ്പോള്‍ സ്വകാര്യ ആശുപത്രിയിലേക്ക് പറഞ്ഞയക്കുകയും അവിടെവച്ച് കുഞ്ഞ് വൈകാതെ മരിക്കുകയുമായിരുന്നു. സംഭവത്തില്‍ ആശുപത്രി അധികൃതര്‍ക്കെതിരേ വലിയ പ്രതിഷേധം ഉയര്‍ന്നു. 

പൊലിസും എസ്എസിഎസ്ടി കമ്മീഷനും സംഭവത്തില്‍ കേസെടുത്തിട്ടുണ്ട്. എന്നാല്‍ ആരോഗ്യവകുപ്പ് നടപടികളൊന്നും ആരംഭിച്ചിട്ടില്ല. ഇതായിരുന്നു പ്രതിഷേധത്തിന്റെ കാരണം. ഇന്നലെ ആശുപത്രിയിലേക്ക് ആദിവാസി സമുദായ സംഘത്തിന്റെ നേതൃത്വത്തില്‍ മാര്‍ച്ചും ധര്‍ണയും നടത്തി. കുറ്റക്കാരെ അടിയന്തരമായി പുറത്താക്കണമെന്നും ആരോഗ്യവകുപ്പ് കൃത്യമായി ഇടപെടണമെന്നും പ്രതിഷേധക്കാര്‍ ആവശ്യമുന്നയിച്ചു.