റിയാദ്: തീര്‍ത്ഥാടകരെ ലൈസന്‍സ് ഇല്ലാത്ത താമസ സൗകര്യങ്ങളില്‍ പാര്‍പ്പിച്ചതുള്‍പ്പെടെ ഗുരുതരമായ നിയമലംഘനങ്ങള്‍ നടത്തിയ രണ്ട് ഉംറ കമ്പനികളെ സസ്‌പെന്റ് ചെയ്ത് സഊദി ഹജ്ജ്, ഉംറ മന്ത്രാലയം. തീര്‍ത്ഥാടകരുടെ സുരക്ഷയെ അപകടപ്പെടുത്തുന്ന ഈ ലംഘനങ്ങള്‍ക്കെതിരെ നിയമനടപടികള്‍ ആരംഭിച്ചതായും കമ്പനി ഉടമകളെ അന്വേഷണത്തിനായി വിളിച്ചുവരുത്തിയതായും മന്ത്രാലയം അറിയിച്ചു.

ALSO READ: സഊദ് രാജാവിന്റെ പുത്രി ബസ്സ രാജകുമാരി നിര്യാതയായി

നിയമലംഘനങ്ങള്‍ക്ക് കര്‍ശന ശിക്ഷ ഉറപ്പാക്കുമെന്ന് മന്ത്രാലയം മുന്നറിയിപ്പ് നല്‍കി. തീര്‍ത്ഥാടകരുടെ അവകാശ സംരക്ഷണവും ഉയര്‍ന്ന സേവന നിലവാരവും ഉറപ്പാക്കാന്‍ ലക്ഷ്യമിട്ട്, സമീപ മാസങ്ങളില്‍ മന്ത്രാലയം പരിശോധനകളും നിരീക്ഷണവും ശക്തമാക്കിയിട്ടുണ്ട്. ലൈസന്‍സിംഗ് ചട്ടങ്ങളും കരാര്‍ ബാധ്യതകളും പാലിക്കാത്ത ഓപ്പറേറ്റര്‍മാര്‍ക്കെതിരെ കര്‍ശന നടപടികള്‍ സ്വീകരിക്കുമെന്നും മന്ത്രാലയം വ്യക്തമാക്കി.

''അശ്രദ്ധയോ കരാര്‍ ലംഘനങ്ങളോ മന്ത്രാലയം അനുവദിക്കില്ല. എല്ലാ ഉംറ ഓപ്പറേറ്റര്‍മാരും ചട്ടങ്ങള്‍ കര്‍ശനമായി പാലിക്കുകയും സേവനങ്ങള്‍ ഷെഡ്യൂള്‍ അനുസരിച്ച് നല്‍കുകയും വേണം,'' മന്ത്രാലയത്തിന്റെ പ്രസ്താവനയില്‍ പറഞ്ഞു.

മക്കയിലെയും മദീനയിലെയും പുണ്യസ്ഥലങ്ങളിലേക്കെത്തുന്ന തീര്‍ത്ഥാടകര്‍ക്ക് സുരക്ഷ, സൗകര്യം എന്നിവ ഉറപ്പാക്കാന്‍ മന്ത്രാലയം പ്രതിജ്ഞാബദ്ധമാണ്. ഉംറ മേഖലയില്‍ പ്രവര്‍ത്തിക്കുന്ന എല്ലാ കമ്പനികളും ഉയര്‍ന്ന പ്രൊഫഷണലിസവും സേവന നിലവാരവും പുലര്‍ത്തണമെന്ന് മന്ത്രാലയം ആവശ്യപ്പെട്ടു.

ALSO READ: ഭക്തിനിര്‍ഭരമായ അന്തരീക്ഷത്തില്‍ വിശുദ്ധ കഅ്ബാലയം കഴുകി

തീര്‍ത്ഥാടന അനുഭവം മെച്ചപ്പെടുത്താനുള്ള സഊദി സര്‍ക്കാരിന്റെ വിശാലമായ പദ്ധതിയുടെ ഭാഗമായാണ് ഈ നടപടികള്‍. സേവന നിലവാരം നിരീക്ഷിക്കുന്നതിനും കരാര്‍ ബാധ്യതകള്‍ പാലിക്കപ്പെടുന്നുണ്ടെന്ന് ഉറപ്പാക്കുന്നതിനുമുള്ള ശ്രമങ്ങള്‍ മന്ത്രാലയം ശക്തിപ്പെടുത്തിയിട്ടുണ്ട്.

Saudi Arabia suspends two Umrah companies for breaching accommodation rules for pilgrims; action part of stricter Hajj and Umrah regulations.