മുക്കം: മലയോര മേഖലയില്‍ മോഷ്ടാക്കള്‍ ജനങ്ങളുടെ ഉറക്കം കെടുത്തുന്നു. കഴിഞ്ഞ രണ്ടു മാസത്തോളമായി മുക്കത്തും പരിസര പ്രദേശങ്ങളിലും തുടര്‍ച്ചയായി ഉണ്ടാകുന്ന മോഷണത്തിന് ഇനിയും അറുതിയായില്ല. പൂളപ്പൊയില്‍, കാതിയോട്, മുണ്ടുപാറ, പൊയില്‍ പ്രദേശങ്ങളിലാണ് ഇപ്പോള്‍ തുടര്‍ച്ചയായി മോഷണം നടക്കുന്നത്.
ഇന്നലെ രാത്രി പൊയില്‍ താഴത്തെപുരക്കല്‍ ഇബ്രാഹിം ഹാജിയുടെ വീട്ടില്‍ നിന്നു 2000 രൂപ മോഷണം പോയി. വീടിന്റെ പിന്‍വശത്തെ വാതിലിലൂടെയാണ് മോഷ്ടാക്കള്‍ അകത്തുകടന്നത്. ബഹളംകേട്ട് വീട്ടുകാര്‍ അറിഞ്ഞതിനാല്‍ കുടുതല്‍ തുക നഷ്ടപ്പെട്ടില്ല. ചപ്പങ്ങാതൊടികയില്‍ മുനീര്‍, അഹമ്മദ് കുട്ടി എന്നിവരുടെ വീടുകളില്‍ മോഷണശ്രമവും നടന്നു. രാത്രി പട്രോളിങ് നടത്തുന്ന പൊലിസിന്റെ കണ്ണുവെട്ടിച്ചാണ് മോഷ്ടാക്കള്‍ വിലസുന്നത്.
ഓമശ്ശേരിക്കടുത്ത് പൂളപ്പൊയില്‍ ഭാഗത്ത് ദിവസങ്ങള്‍ക്ക് മുന്‍പ് മൂന്നു വീടുകള്‍ കുത്തിത്തുറന്ന് 22 പവന്‍ സ്വര്‍ണാഭരണവും 5000 രൂപയും മോഷ്ടിച്ചിരുന്നു. ഒരു വീട്ടില്‍ മോഷണശ്രമവും നടന്നിരുന്നു. അടുക്കള വാതില്‍ പൊളിച്ചാണ് അന്നും മോഷ്ടാക്കള്‍ അകത്തുകടന്നത്. പുലര്‍ച്ചെ രണ്ടിനും നാലിനും ഇടയ്ക്കാണ് മോഷണം നടക്കുന്നതെന്നാണ് നിഗമനം.
മുക്കം പൊലിസും വിരലടയാള വിദഗ്ധരും സ്ഥലത്തെത്തി പരിശോധന നടത്തി. ആഴ്ചകള്‍ക്കു മുന്‍പ് അഗസ്ത്യന്‍മുഴിയിലെ മൂന്നു വീടുകളിലായി നടന്ന മോഷണത്തില്‍ 10 പവനിലധികം നഷ്ടപ്പെട്ടിരുന്നു.
തുടര്‍ച്ചയായി നടക്കുന്ന മോഷണങ്ങള്‍ തടയാന്‍ നാട്ടുകാര്‍ സ്‌ക്വാഡ് രൂപീകരിച്ചിരുന്നു.