ജിദ്ദ: എണ്ണ ഉല്‍പാദനം കുറക്കുന്നതിന് ഒപെക്, ഒപെക് ഇതര രാജ്യങ്ങള്‍ നേരത്തെ ധാരണയിലെത്തിയ കരാറിനെ ഖത്തറുമായി നയതന്ത്ര ബന്ധം വിച്ഛേദിച്ചത് ഒരു വിധത്തിലും ബാധിക്കുകയില്ലെന്ന് സഊദി ഊര്‍ജ്ജ, വ്യവസായ മന്ത്രി എന്‍ജി. ഖാലിദ് അല്‍ഫാലിഹ്. ആഗോള വിപണിയില്‍ എണ്ണ വില ക്രമാതീതമായി ഇടിഞ്ഞ സാഹചര്യത്തിലാണ് എണ്ണ ഉല്‍പാദക രാജ്യങ്ങള്‍ ഈ തീരുമാനത്തിലെത്തിയത്.
കസാഖിസ്ഥാന്‍ തലസ്ഥാനമായ അസ്താനയില്‍ കസാഖിസ്ഥാന്‍ എണ്ണ മന്ത്രി കാനാട്ട് ബോസുംബായേവ്, റഷ്യന്‍ ഊര്‍ജ മന്ത്രി അലക്‌സാണ്ടര്‍ നോവാക് എന്നിവരുമായി നടത്തിയ കൂടിക്കാഴ്ചക്ക് ശേഷം സംസാരിക്കുകയായിരുന്നു മന്ത്രി.

സഊദി അറേബ്യയും ചില സഖ്യകക്ഷി രാഷ്ട്രങ്ങളും ഖത്തറുമായി നയതന്ത്ര ബന്ധം വിഛേദിച്ചത് പെട്രോള്‍ കരാറിനെ ബാധിക്കുകയില്ലെന്ന് റോയിട്ടേഴ്‌സ് ആണ് റിപ്പോര്‍ട്ട് ചെയ്തത്. ഗള്‍ഫ് മേഖലയിലുണ്ടായ പുതിയ പ്രതിസന്ധി തങ്ങള്‍ നിരീക്ഷിക്കുന്നുണ്ട്, എങ്കിലും എണ്ണ ഉദ്പാദനം കുറക്കുന്നതിനുള്ള ധാരണയില്‍ മാറ്റം വരുത്തേണ്ട ആവശ്യമില്ലെന്ന് റഷ്യന്‍ ഊര്‍ജ മന്ത്രി അലക്‌സാണ്ടര്‍ നോവാക് വ്യക്തമാക്കി. പ്രത്യേകിച്ച് ഒരു കൂടിക്കാഴ്ച വിളിക്കേണ്ട സാഹചര്യം നിലവിലില്ല.

കഴിഞ്ഞയാഴ്ച എണ്ണ വില നാല് ശതമാനം ഇടിഞ്ഞതില്‍ അസ്വാഭാവികമായി ഒന്നുമില്ലെന്ന് സഊദി ഊര്‍ജമന്ത്രി വ്യക്തമാക്കി. എണ്ണ ഉല്‍പാദനം കുറക്കുന്നത് ദീര്‍ഘിപ്പിക്കാന്‍ കഴിഞ്ഞമാസം ഉല്‍പാദക രാജ്യങ്ങള്‍ തീരുമാനിച്ചത് വിപണിയില്‍ പ്രതിഫലിക്കുന്നതിന് ആഴ്ചകളും മാസങ്ങളും എടുക്കുമെന്ന് അദ്ദേഹം വിശദമാക്കി. ആഗോള വിപണിയില്‍ എണ്ണവില സമതുലനാവസ്ഥ വീണ്ടെടുക്കുന്നതിനുള്ള നിര്‍ദേശങ്ങളില്‍ താന്‍ പൂര്‍ണമായും സംതൃപ്തനാണ്. നേരത്തെയുള്ള കരാര്‍ നടപ്പാക്കുന്നതിന് റഷ്യയും കസാഖിസ്ഥാനും പൂര്‍ണ പിന്തുണ നല്‍കുമെന്ന് അറിയിച്ചതായും എന്‍ജി. ഖാലിദ് അല്‍ഫാലിഹ് വ്യക്തമാക്കി.