ധാക്ക: റോഹിംഗ്യകളെ റാഖൈനിലേക്ക് മടക്കിയയക്കുന്നതുമായി ബന്ധപ്പെട്ട് ബംഗ്ലാദേശിനും മ്യാന്‍മറിനുമിടയില്‍ ധാരണയായി. നവംബര്‍ മധ്യത്തോടെ മടക്കിയയക്കല്‍ ആരംഭിക്കാന്‍ മ്യാന്‍മര്‍ വിദേശകാര്യ മന്ത്രാലയം പ്രതിനിധി മിന്റ് തൂവുമായുള്ള ചര്‍ച്ചയില്‍ ധാരണയിലെത്തിയെന്ന് ബംഗ്ലാദേശ് വിദേശ സെക്രട്ടറി ഷാഹിദുല്‍ ഹഖ് പറഞ്ഞു.
രാജ്യത്തേക്ക് മടങ്ങുന്നവര്‍ക്ക് സുരക്ഷിതത്വം ഉറപ്പുവരുത്തുമെന്ന് മിന്റ് തൂ പറഞ്ഞു. ഇതിനാവശ്യമായ നടപടികള്‍ സ്വീകരിച്ചുവെന്ന് അദ്ദേഹം മാധ്യമങ്ങളോട് വ്യക്തമാക്കി. കഴിഞ്ഞ ആഗസ്റ്റ് മുതല്‍ റോഹിംഗ്യകള്‍ക്കെതിരേ മ്യാന്‍മര്‍ സൈന്യത്തിന്റെയും ബുദ്ധ സന്ന്യാസികളുടെയും നേതൃത്വത്തില്‍ ആരംഭിച്ച ആക്രമണത്തെ തുടര്‍ന്ന് ഏഴ് ലക്ഷത്തില്‍ കൂടുതല്‍ പേരാണ് അയല്‍രാജ്യമായ ബംഗ്ലാദേശിലേക്ക് കുടിയേറിയത്.
മ്യാന്‍മറില്‍ നിന്നുള്ള റോഹിംഗ്യകളുടെ പലായനം ഇപ്പോഴും തുടരുന്നുണ്ട്. റോഹിംഗ്യകളെ പൗരന്മാരായി പരിഗണിക്കാന്‍ മ്യാന്‍മര്‍ സര്‍ക്കാര്‍ ഇതുവരെ തയാറായിട്ടില്ല. കൂടാതെ റാഖൈനിലേക്ക് അഭയാര്‍ഥികളെ തിരിച്ചയക്കുന്നതിനെതിരേ മനുഷ്യാവകാശ സംഘടനകള്‍ രംഗത്തെത്തിയിരുന്നു.
പുനരധിവാസത്തിന് അനുയോജ്യമായ സാഹചര്യമല്ല അവിടെയുള്ളതെന്നും റോഹിംഗ്യകള്‍ വീണ്ടും അക്രമിക്കപ്പെടാനുള്ള സാധ്യതയുണ്ടെന്നും ആംനെസ്റ്റി ഇന്റര്‍നാഷനല്‍ മുന്നറിയിപ്പ് നല്‍കിയിരുന്നു.