മലപ്പുറം:  കെ.ഇ.ആര്‍ പ്രകാരം 15ന് മുന്‍പ് സര്‍ക്കാര്‍ എയ്ഡഡ് വിദ്യാലയങ്ങളില്‍  തസ്തിക നിര്‍ണയം പൂര്‍ത്തീകരിക്കണമെന്ന നിര്‍ദേശം ഉണ്ടായിട്ടും നാല്  വിദ്യാഭ്യാസ ജില്ലയിലും 17 സബ് ജില്ലയിലും തസ്തിക നിര്‍ണയം  പൂര്‍ത്തിയായിട്ടില്ല. ഇതുമൂലം ജില്ലയിലെ 385 അധ്യാപകര്‍ക്ക് ഈ മാസം മുതല്‍  ശമ്പളവും ആനുകൂല്യവും ലഭിക്കില്ല. ഹൈക്കോടതിയുടെ വിധി പ്രകാരം  തസ്തിക നിര്‍ണയം അതത് വര്‍ഷം നടത്തണമെന്ന് നിര്‍ദേശിച്ചിരുന്നു.
ഉത്തരവ്  നടപ്പാക്കാത്ത നടപടിയില്‍ കേരള  പ്രൈവറ്റ്(എയ്ഡഡ്)സ്‌കൂള്‍ മാനേജേഴ്‌സ് അസോസിയേഷന്‍ ജില്ലാ കമ്മിറ്റി പ്രതിഷേധിച്ചു. 15ന് മുന്‍പ് തസ്തിക നിര്‍ണയം പൂര്‍ത്തീകരിച്ചില്ലെങ്കില്‍ സെപ്തംബര്‍ ഒന്നു മുതല്‍  അനുവദിക്കാത്ത തസ്തികയില്‍ ജോലി ചെയ്യുന്ന എച്ച്.ടി.വി തസ്തികയില്‍  ജോലി ചെയ്യുന്ന അധ്യാപകരെ പിരിച്ച് വിടാനും കേരള  പ്രൈവറ്റ്(എയ്ഡഡ്)സ്‌കൂള്‍ മാനേജേഴ്‌സ് അസോസിയേഷന്‍ ജില്ലാ കമ്മിറ്റി  തീരുമാനിച്ചു.
ജില്ലാ പ്രസിഡന്റ് പാണക്കാട് ഹാഷിം അലി ശിഹാബ് തങ്ങള്‍ ,  സംസ്ഥാന സെക്രട്ടറി നാസര്‍ എടരിക്കോട്, ജില്ലാ ഓര്‍ഗനൈസിംഗ് സെക്രട്ടറി സൈനുല്‍ ആബിദ് പട്ടര്‍കുളം, ബിജുമോന്‍ മേലാറ്റൂര്‍, പൂവാടന്‍ മുഹമ്മദ് ഹാജി,  ഷഹീദ് കുരിക്കള്‍ ചങ്ങംപള്ളി സംസാരിച്ചു.