ലഖ്‌നോ: കന്നൗജില്‍ നിന്ന് അലിഗഢിലെത്തിയ മുസ്‌ലിം കുടുംബത്തിനു നേരെ ആള്‍ക്കൂട്ട ആക്രമണം. അലിഗഢ് റെയില്‍വേ സ്‌റ്റേഷനില്‍ ട്രെയിനിറങ്ങിയപ്പോഴാണ് സംഭവം. 15 പേരടങ്ങുന്ന സംഘം ഒരു കാരണവുമില്ലാതെ മര്‍ദിക്കുകയായിരുന്നു.

'അവര്‍ ട്രെയിനില്‍ നിന്നിറങ്ങുമ്പോള്‍ പൊടുന്നനെ പതിനഞ്ചോളം പേരടങ്ങുന്ന സംഘമെത്തുകയും മുദ്രാവാക്യവും വിളിച്ച് ആക്രമിക്കുകയുമായിരുന്നു. കാവി ധാരികളായിരുന്നു അക്രമികള്‍'- ഫര്‍ഹാന്‍ സുബൈരി എന്നയാള്‍ പറഞ്ഞു.

ആശുപത്രിയില്‍ പോവുന്നതിനു വേണ്ടി എത്തിയതായിരുന്നു രണ്ടു പുരുഷന്മാരും രണ്ടു സ്ത്രീകളും ഉള്‍പ്പെട്ട കുടുംബം. മര്‍ദനത്തിനിരയായ കുടുംബത്തെ പിന്നീട് ജവഹര്‍ലാല്‍ നെഹ്‌റു മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. ഇതില്‍ ഒരാള്‍ക്ക് തലയ്ക്ക് പരുക്കേല്‍ക്കുകയും മറ്റുള്ളവര്‍ക്ക് ശരീരത്തിന്റെ മറ്റു ഭാഗങ്ങളില്‍ പരുക്കേല്‍ക്കുകയും ചെയ്തിട്ടുണ്ട്.

സംഭവത്തില്‍ തിരിച്ചറിയാത്തവര്‍ക്കെതിരെ പൊലിസ് കേസ് രജിസ്റ്റര്‍ ചെയ്തിട്ടുണ്ട്. കുറ്റവാളികളെ കണ്ടെത്താന്‍ സി.സി.ടി.വി ദൃശ്യങ്ങള്‍ പരിശോധിച്ചുവരികയാണഎന്ന് പൊലിസ് പറഞ്ഞു.

സംഭവത്തില്‍ അലിഗഢ് മുസ്‌ലിം സര്‍വകലാശാലാ വിദ്യാര്‍ഥികള്‍ പ്രതിഷേധ പ്രകടനം നടത്തി. അലിഗഢിലെ സാമൂഹ്യസമാധാനം തകര്‍ക്കുകയാണ് ആക്രമണത്തിനു പിന്നിലെ ലക്ഷ്യമെന്ന് വിദ്യാര്‍ഥികള്‍ പറഞ്ഞു.