മേപ്പാടി: മഴക്കാലം തുടങ്ങിയതോടെ ദുരിതപെയ്ത്തില്‍ കഴിയുകയാണ് അമ്പലക്കുന്ന് കോളനിവാസികള്‍. ശൗചാലയം, കുടിവെള്ളം, പൊതുവഴി തുടങ്ങിയ പ്രാഥമിക സൗകര്യങ്ങള്‍ ഇന്നും ഇവര്‍ക്ക് അന്യമാണ്. മുപ്പൈനാട് പഞ്ചായത്തിലെ എട്ടു വാര്‍ഡില്‍ ഉള്‍പ്പെട്ട അമ്പലക്കുന്ന് കോളനിയില്‍ പതിനഞ്ചോളം പണിയ വിഭാഗത്തില്‍പ്പെട്ട കുടുംബങ്ങളാണ് താമസിക്കുന്നത്. വടുവന്‍ചാല്‍ ടൗണില്‍ നിന്നു രണ്ടു കിലോമീറ്റര്‍ സഞ്ചരിച്ചാല്‍ എത്തിപ്പെടുന്ന കോളനി ഭാഗത്തേക്ക് സഞ്ചാര യോഗ്യമായ വഴികളില്ല. 

സമീപത്തെ റോഡില്‍ നിന്ന് കുത്തനെയുള്ള കുന്നിറങ്ങിവേണം പലര്‍ക്കും കോളനിയില്‍ എത്തിപ്പെടാന്‍.
ഇത് കോളനിയില്‍ വൃദ്ധര്‍ക്കും ചെറിയ കുട്ടികള്‍ക്കും ഒരുപാട് പ്രയാസമാണ് ഉണ്ടാക്കുന്നത്. പലര്‍ക്കും സര്‍ക്കാര്‍ വീടിനായി ഫണ്ട് അനുവദിച്ചിട്ടുണ്ടങ്കിലും കോളനിയില്‍ നാമമാത്രമായ വീടുകളാണ് നിര്‍മിച്ചിട്ടുള്ളത്.
കാലവര്‍ഷം തുടങ്ങിയാല്‍ ചോര്‍ച്ചയില്‍ മുങ്ങുന്ന ഗതിയാണ് പല വീടുകളുടേയും. ആകെയുള്ള കിണര്‍ ചളിയും പായലും നിറഞ്ഞതോടെ വെള്ളം വീട്ടാവശ്യങ്ങള്‍ക്ക് ഉപയോഗിക്കാന്‍ പറ്റാറില്ലെന്ന് കോളനിക്കാര്‍ പറയുന്നു.