കൊല്ലങ്കോട്: സ്‌കൂള്‍ സമയങ്ങളിലെ പൊലിസ് അസാന്നിധ്യം വിദ്യാര്‍ഥികളെ ദുരിതത്തിലാക്കുന്നു. പുതുനഗരം, കൊടുവായൂര്‍, വടവന്നൂര്‍, മുതലമട, കൊല്ലങ്കോട് എന്നീ പഞ്ചായത്തുകളിലെ വിദ്യാലയങ്ങളിലെ വിദ്യാര്‍ഥികളാണ് സ്‌കൂള്‍ സ്റ്റോപ്പുകളില്‍ പൊലിസില്ലാത്തതിനാല്‍ പ്രയാസപ്പെടുന്നത്. വിദ്യാര്‍ഥികള്‍ കയറുന്നതിനു മുന്‍പേ ബസുകള്‍ പുറപ്പെടുന്നതും സ്റ്റോപ്പില്‍നിന്നും മാറി ബസുകള്‍ നിര്‍ത്തിയിടുന്നതും മിക്കപ്പോഴും വിദ്യാര്‍ഥികള്‍ അപകടത്തില്‍പ്പെട്ട് പരുക്കേല്‍ക്കുവാന്‍ കാരണമാകുന്നു.
വിദ്യാര്‍ഥികള്‍ ക്യൂനിന്നാല്‍ പോലും ബസുകള്‍ നിര്‍ത്തി വിദ്യാര്‍ഥികളെ കയറ്റാറില്ലെന്നും ആരോപണമുണ്ട്. അധ്യാപകരും രക്ഷിതാക്കളും ഇടപെട്ടിട്ടും കുട്ടികളുടെ സുരക്ഷ ഉറപ്പാക്കുവാന്‍ സാധിച്ചിട്ടില്ല. പുതുനഗരം ജങ്ഷനിലും മുതലമട ഹയര്‍ സെക്കന്‍ഡറി സ്‌ക്കൂള്‍, കൊല്ലങ്കോട് ബി.എസ്.സ്.എച്ച്.എസ് സ്‌കൂള്‍, പെരുവെമ്പ് ജങ്ഷന്‍ എന്നിവിടങ്ങളിലും സ്‌കൂള്‍ സമയങ്ങളില്‍ പൊലിസുകാരെ നിയമിക്കുകയും വിദ്യാര്‍ഥികളെ കയറ്റാത്ത ബസുകള്‍ക്കെതിരേ നടപടിയെടുക്കകയും വേണം.