വടകര: ചോറോട് പഴയ റെയില്‍വേ ഗേറ്റ് റോഡാകെ വന്‍ കുഴികള്‍. ചോറോട് മേല്‍പ്പാലം തുറന്ന് റെയില്‍വേ ഗേറ്റ് എന്നെന്നേക്കുമായി അടച്ചപ്പോള്‍ മെയിന്‍ റോഡ് ഇല്ലാതായെങ്കിലും ഈ റോഡിന്റെയും പൈപ്പ്‌ലൈന്‍ റോഡിന്റെയും സ്ഥിതി പരിതാപകരമാണ്. പതിനഞ്ചു വര്‍ഷത്തിലധികമായി റോഡ് കുണ്ടും കുഴിയും നിറഞ്ഞു കിടക്കുന്നു. പഴയ ഗേറ്റിന്റെ മുന്നിലും പരിസരത്തും ആളെ വീഴ്ത്തുന്ന വന്‍ കുഴികളാണ്.
ഇവിടെ നിന്ന് രണ്ടു ഭാഗത്തേക്കും പോയാല്‍ വിദ്യാലയങ്ങളുണ്ട്. ചോറോട് നിന്ന് കൈനാട്ടി, ഓര്‍ക്കാട്ടേരി ഭാഗത്തേക്ക് ദേശീയ പാത ഒഴിവാക്കി സഞ്ചരിക്കാനുള്ള എളുപ്പവഴി കൂടിയാണിത്. ദേശീയ പാതയിലും കുറ്റ്യാടി സംസ്ഥാന പാതയിലും ഗതാഗത തടസമുണ്ടായാല്‍ വാഹനം തിരിച്ചു വിടുന്നതും ഇതുവഴിയാണ്.
മലോല്‍മുക്ക് ഭാഗത്തേക്കുള്ള ബസ് സര്‍വിസ് അടക്കം ഇതുവഴിയാണ്. എന്നാല്‍ മേല്‍പ്പാലം വന്ന ശേഷം ഒരിക്കല്‍ പോലും കുഴിയടച്ചിട്ടില്ല. ഇതിനപ്പുറം പൈപ്പ് റോഡിന്റെ കുറെ ഭാഗം എം.എല്‍.എ ഫണ്ട് ഉപയോഗിച്ച് ടാറിട്ടിരുന്നു. അതും മുഴുമിപ്പിക്കാതിരുന്ന പൊതുമരാമത്ത് വകുപ്പ് അനുബന്ധ റോഡിലെ കുഴികളും കാണുന്നില്ല. പൊതുമരാമത്ത് വകുപ്പിന്റെ കീഴിലായതു കൊണ്ട് ഗ്രാമ പഞ്ചായത്തിന് അറ്റകുറ്റപ്പണി നടത്താനാവുന്നില്ല. ഇതാണ് നാട്ടുകാര്‍ക്ക് ദുരിതമായിരിക്കുന്നത്. പല സ്ഥലത്തും ടാര്‍ പോലും ഇല്ലാതെ വന്‍ കുഴിയായിരിക്കുകയാണ്.