കണ്ണൂര്‍: ശബരിമലയെ കളങ്കപ്പെടുത്തുന്നവരുമായി തന്ത്രി ഗൂഢാലോചന നടത്തിയെന്ന് മുഖ്യമന്ത്രി പിണറായി വിജയന്‍. ശബരിമലയില്‍ വിശ്വാസികളുടെ ഇടപെടലല്ല, സംഘ്പരിവാര്‍ സംഘടനകളുടെ രാഷ്ട്രീയ ഇടപെടലാണ് നടന്നതെന്നും ശ്രീധരന്‍ പിള്ളയുടെ വെളിപ്പെടുത്തലോടെ തെളിഞ്ഞു. ശബരിമലയെ കലാപഭൂമിയാക്കരുതെന്ന് ആവശ്യപ്പെട്ട് എല്‍.ഡി.എഫ് കണ്ണൂരില്‍ നടത്തിയ റാലി ഉദ്ഘാടനം ചെയ്യുകയായിരുന്നു അദ്ദേഹം.
ബി.ജെ.പിയുടെ അജന്‍ഡക്കനുസരിച്ച് നില്‍ക്കുകയാണ് തന്ത്രിയും പന്തളം രാജകുടുംബവും ചെയ്തത്. സര്‍ക്കാര്‍ ചര്‍ച്ചക്ക് ക്ഷണിച്ചപ്പോള്‍ പിന്‍മാറിയത് ഇതിന്റെ ഭാഗമായാണ്. ശബരിമലയെപോലെ തന്ത്രപ്രധാന സ്ഥാനത്തിരിക്കുന്ന തന്ത്രിക്ക് ബി.ജെ.പി അധ്യക്ഷനുമായാണ് ബന്ധമെന്നത് ആശങ്കയുണ്ടാക്കുന്ന കാര്യമാണ്. ശബരിമല നന്നാക്കാനുള്ള പുറപ്പാടല്ല ഇക്കൂട്ടരുടേതെന്നും മുഖ്യമന്ത്രി വ്യക്തമാക്കി.
നിയമോപദേശം തേടാനാണ് ബി.ജെ.പി അധ്യക്ഷനെ വിളിച്ചതെന്നാണ് തന്ത്രിയുടെ നിലപാട്. ശബരിമല വിഷയത്തില്‍ തന്ത്രി നിയമോപദേശം തേടേണ്ടതു ബന്ധപ്പെട്ട അഭിഭാഷകനോടും ശബരിമല കേസ് നിരീക്ഷിക്കുന്ന റിട്ട. ജഡ്ജിയോടുമാണ്. വേണമെങ്കില്‍ സംസ്ഥാനത്തെ അഡ്വക്കറ്റ് ജനറലിനോടും കേന്ദ്ര അറ്റോര്‍ണി ജനറലിനോടും ഉപദേശം തേടാം. പ്രശ്‌നമുണ്ടാക്കുന്നവരുടെ ഗൂഢാലോചനയില്‍ തന്ത്രിയും ഭാഗമായി എന്നല്ലേ ശ്രീധരന്‍പിള്ളയുടെ വെളിപ്പെടുത്തലില്‍ വ്യക്തമാകുന്നത്. ഇതു സാധാരണരീതിയില്‍ സംഭവിക്കാന്‍ പാടില്ലായിരുന്നു. ശ്രീധരന്‍പിള്ളയെ മറ്റൊരു ഫോണില്‍ വിളിച്ച കാര്യവും തന്ത്രി വ്യക്തമാക്കണം. പവിത്രമായ ശബരിമല അശുദ്ധമാക്കാന്‍ ശ്രമിക്കുന്നവരുമായി തന്ത്രി ഗൂഢാലോചന നടത്തിയെന്നാണ്‌വെളിവാക്കുന്നത്. ശ്രീധരന്‍പിള്ളയുടെ ചെയ്തികളില്‍ കൂട്ടുകാരനായ തന്ത്രി ഇതു തുടരാനാണോ നീക്കമെന്നു വ്യക്തമാക്കണം. ഇതു അതീവ ഗൗരവമുള്ള പ്രശ്‌നമാണ്. ഈ വഴി തുടരാനാണോ നീക്കമെന്ന് തന്ത്രി വ്യക്തമാക്കണം. ആ രീതിയാണെങ്കില്‍ ഇവിടെ ചെലവാകില്ല. കുറച്ചാളുകളെ കൂട്ടിയാല്‍ ഈ നാട്ടിലെ മതനിരപേക്ഷ മനസ് ഉലയില്ല. ഓരോ നുണയും അടുത്തനിമിഷം പൊളിയുകയാണ്. എന്തു വിലകൊടുത്തും ശബരിമലയിലെത്തുന്ന വിശ്വാസികള്‍ക്കു സര്‍ക്കാര്‍ സംരക്ഷണം നല്‍കും. അതോടൊപ്പം അവിശ്വാസികള്‍ക്കും അവരുടെ രീതിയില്‍ ജീവിക്കാന്‍ സര്‍ക്കാര്‍ സംരക്ഷണമൊരുക്കും. കോടതിവിധി നടപ്പാക്കാനേ സര്‍ക്കാരിനു കഴിയൂ. നാളെ സുപ്രിംകോടതി മറിച്ചൊരു തീരുമാനമെടുത്താലും അതോടൊപ്പമായിരിക്കും സര്‍ക്കാരെന്നും മുഖ്യമന്ത്രി പറഞ്ഞു.