ജകാര്‍ത്ത: അട്ടിമറി വിജയം സ്വന്തമാക്കി മുന്നേറുന്ന ഇന്ത്യയുടെ എച്.എസ് പ്രാണോയിയും കെ ശ്രീകാന്തും ഇന്തോനേഷ്യ സൂപ്പര്‍ സീരീസ് പ്രീമിയര്‍ ബാഡ്മിന്റണിന്റെ സെമിയിലെത്തി. പ്രീ ക്വാര്‍ട്ടറില്‍ ലോക മൂന്നാം നമ്പര്‍ താരം ലീ ചോങ് വീയെ അട്ടിമറിച്ച പ്രാണോയ് ക്വാര്‍ട്ടറിലും അട്ടിമറി തുടര്‍ന്നപ്പോള്‍ ഇത്തവണ അടിതെറ്റിയത് ഒളിംപിക്ക് ചാംപ്യന്‍ ചെന്‍ ലോങിനായിരുന്നു. ശ്രീകാന്ത് ക്വാര്‍ട്ടറില്‍ സു വി വാങിനെയാണ് കീഴടക്കിയത്.
ഒളിംപിക്ക് ചാംപ്യന്‍ ചൈനയുടെ ലിന്‍ ഡാനെതിരേ ഇഞ്ചോടിഞ്ച് പൊരുതിയാണ് പ്രാണോയ് വിജയം സ്വന്തമാക്കിയത്. മൂന്ന് സെറ്റ് നീണ്ട പോരാട്ടം തുടക്കം മുതല്‍ ഒടുക്കം വരെ ആവേശം നിറഞ്ഞതായി മാറി. സ്‌കോര്‍: 21-18, 16-21, 21-19. ആദ്യ സെറ്റില്‍ വിജയം സ്വന്തമാക്കിയ പ്രാണോയ് രണ്ടാം സെറ്റ് അടിയറവച്ചെങ്കിലും നിര്‍ണായക മൂന്നാം സെറ്റില്‍ കടുത്ത പോരാട്ടം പുറത്തെടുത്താണ് പ്രാണോയി വിജയവും സെറ്റും സ്വന്തമാക്കിയത്. കളിയിലുടനീളം മികച്ച ഷോട്ടുകളും റിട്ടേണുകളുമായി ഇന്ത്യന്‍ താരം തിളങ്ങി. കരിയറില്‍ നേര്‍ക്കുനേര്‍ ഇത് നാലാം തവണയാണ് ഇരുവരും ഏറ്റുമുട്ടിയത്.
കഴിഞ്ഞ മൂന്ന് തവണയും ചെനിന് മുന്നില്‍ അടിയറവ് പറഞ്ഞ പ്രാണോയ് ഇത്തവണ പക്ഷേ മികച്ച വിജയം സ്വന്തമാക്കിയാണ് അവസാന നാലില്‍ ഇടമുറപ്പിച്ചത്.
ലോക ഒന്‍പതാം നമ്പര്‍ താരം ഡെന്‍മാര്‍കിന്റെ യാന്‍ യോര്‍ഗെന്‍സനെ അട്ടിമറിച്ച് ക്വാര്‍ട്ടറിലെത്തിയ ശ്രീകാന്തും മികവ് ആവര്‍ത്തിക്കുകയായിരുന്നു.
ചൈനീസ് തായ്‌പേയ് താരം സു വി വാങിനെ രണ്ട് സെറ്റ് മാത്രം നീണ്ട പോരാട്ടത്തില്‍ അനായാസം മറികടക്കാന്‍ ശ്രീകാന്തിന് സാധിച്ചു. സ്‌കോര്‍: 21-15, 21-14.