ന്യൂഡല്‍ഹി: തന്റെ തിരോധാനവുമായി ബന്ധപ്പെട്ട് പ്രചരിക്കുന്ന വാര്‍ത്തകള്‍ തീര്‍ത്തും അടിസ്ഥാനരഹിതമെന്നും ഇസ്‌ലാം സ്വീകരിച്ചത് സ്വന്തം ഇഷ്ടപ്രകാരമാണെന്നും ഡല്‍ഹിയില്‍ നിന്ന് കാണാതായെന്ന് ബന്ധുക്കള്‍ ആരോപിക്കുന്ന മലയാളി പെണ്‍കുട്ടി.
അബൂദബിയില്‍ എത്തിയതും മതംമാറിയതും എല്ലാം സ്വന്തം ഇഷ്ടപ്രകാരമാണെന്നും തനിക്ക് എതിരായ കേസുകള്‍ അവസാനിപ്പിക്കണമെന്നും ഇക്കാര്യങ്ങള്‍ ചൂണ്ടിക്കാട്ടി പെണ്‍കുട്ടി രാഷ്ട്രപതി, പ്രധാനമന്ത്രി, കേന്ദ്ര ആഭ്യന്തരമന്ത്രി, ഡല്‍ഹി- കേരള മുഖ്യമന്ത്രിമാര്‍, സി.ബി.ഐ, കേന്ദ്ര ന്യൂനപക്ഷ കമ്മിഷന്‍ എന്നിവര്‍ക്ക് അയച്ച കത്തില്‍ ആവശ്യപ്പെട്ടു. ഈ മാസം 18നാണ് അബൂദബിയിലെത്തിയത്. അവിടത്തെ കോടതിയില്‍ വച്ച് ഇസ്‌ലാം സ്വീകരിച്ചു. തന്നെ ആരും തട്ടിക്കൊണ്ടുപോയിട്ടില്ല. തനിക്ക് തീവ്രവാദ ബന്ധമില്ല. തിരോധാനവുമായി ബന്ധപ്പെട്ട് നടക്കുന്ന പ്രചാരണങ്ങള്‍ക്ക് തടയിടാന്‍ നടപടി സ്വീകരിക്കണമെന്നും ആയിശ (സിയാന ബെന്നി) എന്ന 19കാരി അഭ്യര്‍ഥിച്ചു.
കത്തിന്റെ പൂര്‍ണ രൂപം ഇങ്ങനെ: ഞാന്‍ ആയിഷ (സിയാന ബെന്നി), പ്രായപൂര്‍ത്തിയായ ഇന്ത്യന്‍ പൗരയെന്ന നിലയില്‍ രാജ്യത്തിന്റെ ഭരണഘടന ഓരോ പൗരനും മതസ്വാതന്ത്ര്യവും അഭിപ്രായ സ്വാതന്ത്ര്യവും ഉറപ്പാക്കുന്നുണ്ടെന്ന് വിശ്വസിക്കുന്നു. സെപ്റ്റംബര്‍ 18ന് വൈകിട്ട് ഞാന്‍ ഡല്‍ഹി രാജ്യാന്തര വിമാനത്താവളത്തില്‍ നിന്ന് അബൂദബിയില്‍ എത്തി. വിസയും വിമാന ടിക്കറ്റും ലഭ്യമാക്കാനും അബൂദബിയില്‍ എത്താനും ഒരു വ്യക്തി എന്നെ സഹായിച്ചു. സ്വന്തം ഇഷ്ടപ്രകാരം സെപ്റ്റംബര്‍ 24ന് അബൂദബി കോടതിയില്‍ വച്ച് ഇസ്‌ലാം സ്വീകരിച്ച് ആയിഷ എന്ന പേര് സ്വീകരിച്ചു.
മാതാപിതാക്കളായ ബെന്നി വര്‍ഗീസ്, ആനിയമ്മ, സഹോദരന്‍ ബോണി ബെന്നി എന്നിവര്‍ അബൂദബിയില്‍ വച്ച് കണ്ടിരുന്നു. അവരോടും ഞാന്‍ സ്വന്തം ഇഷ്ടപ്രകാരമാണ് ഇവിടെ എത്തിയതെന്നും മതം മാറിയതെന്നും അറിയിച്ചു. എന്നെ തട്ടിക്കൊണ്ടുപോയെന്നും തീവ്രവാദ സംഘത്തിന്റെ ഭാഗമാണ് ഞാനെന്നുമുള്ള വിധത്തിലുള്ള വാര്‍ത്തകള്‍ പ്രചരിക്കുന്നത് തടയണമെന്ന് സംസ്ഥാനത്തോടും പൊലിസിനോടും മാധ്യമങ്ങളോടും അഭ്യര്‍ഥിക്കുകയാണ്.
ഡല്‍ഹി സര്‍വകലാശാലവിദ്യാര്‍ഥിയായിരുന്ന ആയിഷ ഇക്കാര്യം ഗള്‍ഫ് ന്യൂസുമായും ഇന്നലെ ആവര്‍ത്തിച്ചു. നേരത്തെ, പ്രണയിക്കുന്ന ആളെ വിവാഹം കഴിക്കാനാണ് താന്‍ ഉദ്ദേശിക്കുന്നതെന്ന് പെണ്‍കുട്ടി ഇന്ത്യന്‍ എംബസിയെ അറിയിച്ചിരുന്നു. ഇതോടെ പെണ്‍കുട്ടിക്ക് പ്രായപൂര്‍ത്തിയായതിനാല്‍ അവരെ എംബസി സ്വന്തം ഇഷ്ടത്തിന് വിടുകയായിരുന്നു.
സംഭവം ലൗജിഹാദ് ആയി ചിത്രീകരിച്ച് ഒരുവിഭാഗം മാധ്യമങ്ങളും ന്യൂനപക്ഷ കമ്മിഷന്‍ വൈസ് ചെയര്‍മാന്‍ ജോര്‍ജ് കുര്യന്‍ ഉള്‍പ്പെടെയുള്ള ബി.ജെ.പി നേതാക്കളും ആരോപിച്ചുവരുന്നതിനിടെയാണ് പെണ്‍കുട്ടി നിലപാട് വ്യക്തമാക്കി രംഗത്തുവന്നത്.