തൊട്ടില്‍പ്പാലം: കാവിലുംപാറ പട്ട്യാട്ട് വീട്ടുവളപ്പിലെ കിണറ്റില്‍ വീണ പുള്ളിമാനിനെ നാട്ടുകാരും വനപാലകരും ചേര്‍ന്ന് രക്ഷപ്പെടുത്തി. മൂക്കന്‍തോട്ടത്തില്‍ മത്തായിയുടെ കിണറ്റിലാണ് ശനിയാഴ്ച പുലര്‍ച്ചെ അഞ്ച് വയസ് പ്രായം വരുന്ന മാന്‍ അകപ്പെട്ടത്. 

ചെന്നായകൂട്ടം പിന്തുടര്‍ന്നതിനെ തുടര്‍ന്ന് രക്ഷപ്പെടുന്നതിനിടെ കിണറ്റില്‍ വീഴുകയായിരുന്നു. കുറ്റ്യാടിയില്‍ നിന്നെത്തിയ ഫോറസ്റ്റ് അധികാരികളും നാട്ടുകാരും ചേര്‍ന്ന് രക്ഷപ്പെടുത്തി. അതേസമയം വനപാലകരുടെ പക്കല്‍ കൂടില്ലാതിരുന്നത് തുടക്കത്തില്‍ രക്ഷാപ്രവര്‍ത്തനത്തിന് പ്രയാസം സൃഷ്ടിച്ചു.
പിന്നീട് നാട്ടുകാര്‍ തയാറാക്കിയ കൂട്ടിലാണ് മാനിനെ കരയ്‌ക്കെത്തിച്ചത്. രക്ഷപ്പെടുത്തിയ പുള്ളിമാനിനെ വയനാട് വന്യമൃഗസംരക്ഷണ കേന്ദ്രത്തിലേക്ക് കൊണ്ടുപോയി.