പുത്തന്‍ചിറ: പിണ്ടാണി പേന്‍തുരുത്തില്‍ അന്യസംസ്ഥാന യുവതിയെ പരുക്കുകളോടെ ദുരൂഹ സാഹചര്യത്തില്‍ മരിച്ച നിലയില്‍ കണ്ടെത്തിയ സംഭവത്തില്‍ ഭര്‍ത്താവ് അറസ്റ്റിലായി. പേന്‍തുരുത്തിലെ സ്വകാര്യ ഫാം ഹൗസിലാണ് 29 വയസുള്ള സുശീല എന്ന വെസ്റ്റ് ബംഗാള്‍ യുവതിയെ മരിച്ച നിലയില്‍ കണ്ടെത്തിയ സംഭവത്തിലാണ് ഭര്‍ത്താവ് ബിനു ഒറോന്‍ (36) നെ മാള സി.ഐ ഭൂപേഷിന്റെ നേതൃത്വത്തില്‍ പിടികൂടിയത്. തിങ്കളാഴ്ച രാത്രി ഒരുമണിയോടെയാണ് പ്രതി സ്വന്തം ഭാര്യയെ വടിയുപയോഗിച്ച് തലയിലും ശരീരമാസകലവും അടിച്ച് കൊലപ്പെടുത്തിയത്. മറ്റൊരു ഇതര സംസ്ഥാന യുവാവുമായി ഭാര്യക്ക് ബന്ധമുണ്ടെന്ന സംശയമാണ് കൊലപാതകത്തിന് കാരണം. പേന്തുരുത്തില്‍. കോഴി, പന്നി, ഫാം നടത്തുന്ന പീറ്ററിന്റെ ഫാമില്‍ പണിയെടുത്തിരുന്ന ഇതര സംസ്ഥാന തൊഴിലാളിയാണ് സ്വന്തം ഭാര്യയെ തലയക്ക് അടിച്ച് കൊന്ന് നാടിനെ നടുക്കിയത്. അറസ്റ്റ് രേഖപ്പെടുത്തിയ പ്രതിയെ ഇന്ന് ചാലക്കുടി ഫസ്റ്റ് ക്ലാസ് മജിസ്‌ട്രേറ്റ് കോടതിയില്‍ ഹാജരാക്കും. പിണ്ടാണിയിലെ രണ്ടാമത് കൊലപാതകമാണിത്. ഒരു ആസാം സ്വദേശിയെ സ്വന്തം സുഹൃത്ത് കത്തിച്ചു കൊന്നത് ഒന്നര വര്‍ഷം മുന്‍പാണ്. ഈ സംഭവത്തില്‍ ഇതുവരെ ആരെയും പിടികൂടാനായിട്ടില്ല.