വാഷിങ്ടണ്‍:അമേരിക്കയിലെ കാലിഫോര്‍ണിയയില്‍ നിശാക്ലബിലുണ്ടായ വെടിവയ്പില്‍ പൊലിസുകാരനടക്കം 13 പേര്‍ കൊല്ലപ്പെട്ടു. അക്രമിയും കൊല്ലപ്പെട്ടുവെന്നാണ് വിവരം. നിരവധി പേര്‍ക്കു പരുക്കേറ്റിട്ടുമുണ്ട്.
തൗസന്റ് ഓക്‌സ് എന്ന നഗരത്തില്‍ പ്രാദേശിക സമയം ബുധനാഴ്ച രാത്രിയാണ് സംഭവം. യൂനിവേഴ്‌സിറ്റി വിദ്യാര്‍ഥികള്‍ ബോര്‍ഡ്‌ലൈന്‍ ബാര്‍ ആന്‍ഡ് ഗ്രില്‍ എന്ന നിശാക്ലബില്‍ സംഘടിപ്പിച്ച പരിപാടിക്കിടെയാണ് ആക്രമണം. ഇരുനൂറോളം പേരാണ് ക്ലബിലുണ്ടായിരുന്നത്. നാവികസേനാംഗമായ ഡേവിഡ് ലോങ്ങാ (28)ണ് ആക്രമണം നടത്തിയത്. ഇതിനു പിന്നിലെ കാരണം വ്യക്തമല്ല.
ആക്രമണം നടന്ന കെട്ടിടത്തിനകത്തെ ദൃശ്യങ്ങള്‍ ഭീകരമായിരുന്നുവെന്നു കാലിഫോര്‍ണിയയിലെ വെന്റൂറ കൗണ്ടി പൊലിസ് പറഞ്ഞു. വിവരം ലഭിച്ചു മൂന്നു മിനുട്ടിനുള്ളില്‍ പൊലിസ് പ്രദേശത്തെത്തി.
റോണ്‍ ഹെലൂസ് എന്ന പൊലിസുകാരനാണ് ആക്രമണത്തില്‍ കൊല്ലപ്പെട്ടത്. കെട്ടിടത്തിനു സമീപത്ത് പട്രോളിങ് നടത്തുകയായിരുന്ന ഇദ്ദേഹം അക്രമണം നടക്കുന്നതിനിടെ ക്ലബിലേക്കു പ്രവേശിക്കുകയായിരുന്നു. അക്രമി നിരവധി തവണ റോണ്‍ ഹെലൂസിനു നേരെ വെടിയുതിര്‍ത്തിരുന്നു. ആശുപത്രിയില്‍വച്ചാണ് ഇദ്ദേഹം മരിച്ചത്.
ക്ലബിലേക്കു കറുത്ത വസ്ത്രം ധരിച്ചെത്തിയ അക്രമി നിറയൊഴിക്കുകയായിരുന്നുവെന്നു ദൃക്‌സാക്ഷികള്‍ പറഞ്ഞു. സ്‌മോക്ക് ഗ്രനേഡ് ഉപയോഗിച്ച ഇയാള്‍, സെമി ഓട്ടോമാറ്റിക് തോക്കിലൂടെയാണ് വെടിവച്ചതെന്നും റിപ്പോര്‍ട്ടുകളുണ്ട്.
കൊലപാതകത്തില്‍ പ്രസിഡന്റ് ഡൊണാള്‍ഡ് ട്രംപ് അനുശോചിച്ചു. യു.എസില്‍ തുടര്‍ച്ചയായുണ്ടാകുന്ന വെടിവയ്പിനെതിരേ രാജ്യവ്യാപകമായി പ്രതിഷേധമുയര്‍ന്നിരുന്നു. ഫെബ്രുവരിയില്‍ ഫ്‌ളോറിഡയിലെ സ്‌കൂളിലുണ്ടായ വെടിവയ്പില്‍ വിദ്യാര്‍ഥികള്‍ ഉള്‍പ്പെടെ 17 പേര്‍ കൊല്ലപ്പെട്ടിരുന്നു. കഴിഞ്ഞ വര്‍ഷം ഒക്ടോബറില്‍ ലാസ് വേഗസിലുണ്ടായ വെടിവയ്പില്‍ 58 പേര്‍ കൊല്ലപ്പെട്ടിരുന്നു.