തിരുവനന്തപുരം: സംസ്ഥാന ആസൂത്രണ ബോര്‍ഡിലെ ഉന്നത തസ്തികയിലേക്ക് പി.എസ്.സി വന്‍ അട്ടിമറി. എഴുത്തു പരീക്ഷയില്‍ ഉയര്‍ന്ന മാര്‍ക്ക് കരസ്ഥമാക്കിയ ഉദ്യോഗാര്‍ഥികളെ പുറത്താക്കി പകരം പിന്നിലായ ആസൂത്രണ ബോര്‍ഡിലെ മൂന്ന് ഉദ്യോഗസ്ഥര്‍ക്ക് നിയമനം നല്‍കി. ഉദ്യോഗാര്‍ഥികള്‍ക്ക് അഭിമുഖത്തില്‍ മാര്‍ക്ക് കുറച്ച് നല്‍കി പുറത്താക്കുകയായിരുന്നു. പി.എസ്.സി നടത്തുന്ന ഏറ്റവും ഉയര്‍ന്ന പരീക്ഷയായ ആസൂത്രണ ബോര്‍ഡ് ചീഫ് സോഷ്യല്‍ സര്‍വിസ് ,ചീഫ് പ്ലാനിങ് കോഓഡിനേഷന്‍ ,ചീഫ് ഡീ സെന്‍ട്രലൈഡ്‌സ് പ്ലാനിങ് എന്നിവയുടെ റാങ്ക് പട്ടികയിലാണ് ക്രമക്കേട് നടന്നത്. 89,000-1,20,000രൂപ ശമ്പള സ്‌കെയ്‌ലിലാണ് നിയമനം.

എഴുത്ത് പരീക്ഷയ്ക്കുശേഷം നടത്തുന്ന അഭിമുഖങ്ങളില്‍ ഉദ്യോഗാര്‍ഥികള്‍ക്ക് 70ശതമാനത്തിന് മുകളില്‍ മാര്‍ക്ക് നല്‍കാന്‍ പാടില്ലെന്ന സുപ്രിംകോടതിവിധി നിലനില്‍ക്കെയാണ് ഇടതുപക്ഷ അനുഭാവികളായ മൂന്നുപേര്‍ക്ക് 90മുതല്‍ 95ശതമാനം വരെ മാര്‍ക്ക് നല്‍കിയത്. പി.എസ്.സി അഭിമുഖത്തില്‍ ലഭിച്ച ഏറ്റവും ഉയര്‍ന്ന മാര്‍ക്കാണ് ഇതെന്ന് അധികൃതര്‍ കുറ്റപ്പെടുത്തി.

2018 നവംബറില്‍ നടന്ന എഴുത്തുപരീക്ഷയില്‍ തസ്തികകളിലായി ഓരോ ഒഴിവുകള്‍ വീതമാണ് ഉണ്ടായിരുന്നത്. ചീഫ് സോഷ്യല്‍ സര്‍വിസ് തസ്തികയില്‍ 2009ല്‍ 91.75 മാര്‍ക്ക് നേടി ഒന്നാമതെത്തിയ സൗമ്യക്ക് കഴിഞ്ഞ സെപ്റ്റംബറില്‍ പി.എസ്.സി നടത്തിയ അഭിമുഖത്തില്‍ കിട്ടിയത് 40ല്‍ 11മാര്‍ക്കാണ്. സൗമ്യക്ക് പിന്നാലെ രണ്ട്,മൂന്ന്,അഞ്ച് സ്ഥാനങ്ങളിലെത്തിയ കെ.ജി.ഒ.എ സംസ്ഥാന നേതാവിനും ആസൂത്രണ ബോര്‍ഡിലെ രണ്ട് ഉദ്യോഗസ്ഥര്‍ക്കും 36 മാര്‍ക്ക് ലഭിച്ചതോടെ സൗമ്യ നാലാം സ്ഥാനത്തായി.

അഭിമുഖത്തില്‍ വാരിക്കോരി മാര്‍ക്ക് നല്‍കിയതോടെ എഴുത്തുപരീക്ഷയില്‍ പിന്നിലായ ഇടത് അനുഭാവികളായ മൂന്നിപേരും റാങ്ക് പട്ടികയില്‍ നിയമനം ഉറപ്പിച്ചു. മൂന്നുപേര്‍ക്കും ആസൂത്രണ ബോര്‍ഡിലുണ്ടായ മുന്‍പരിചയവും അറിവും പരിഗണിച്ചാണ് മാര്‍ക്ക് നല്‍കിയതെന്ന് പി.എസ്.സി ചെയര്‍മാന്‍ അഡ്വ.എം.കെ സക്കീര്‍ പറഞ്ഞു. അതേ സമയം അങ്ങനെയുള്ളവര്‍ എഴുത്തു പരീക്ഷയില്‍ പിന്നോക്കം പോയതെങ്ങനെ എന്ന ചോദ്യത്തിന് പി.എസ്.സിക്ക് മറുപടിയില്ല.