റായ്പൂര്‍: ഛത്തിസ്ഗഡ് നിയമസഭാ തെരഞ്ഞെടുപ്പ് പ്രചാരണത്തില്‍ മോദിക്കും കേന്ദ്ര സര്‍ക്കാരിനുമെതിരേ ആഞ്ഞടിച്ചു കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി. പാവപ്പെട്ടവരുടെ കടബാധ്യതയെക്കുറിച്ചു മൗനം പാലിക്കുന്ന പ്രധാനമന്ത്രി നരേന്ദ്ര മോദി, തെരഞ്ഞെടുക്കപ്പെട്ട ചില വ്യവസായികളുടെ വായ്പകള്‍ എഴുതിത്തള്ളുകയാണ് ചെയ്തതെന്നു കാങ്കര്‍ ജില്ലയിലെ പഖന്‍ജോറില്‍ നടന്ന തെരഞ്ഞെടുപ്പ് റാലിയില്‍ രാഹുല്‍ ആരോപിച്ചു.
അധികാരത്തിലേറിയ 2014 മുതല്‍ തെരഞ്ഞെടുക്കപ്പെട്ട 15 വ്യവസായികളുടെ 3.5 ലക്ഷം കോടി വായ്പയാണ് മോദി എഴുതിത്തള്ളിയത്.
രാജ്യത്തു നടപ്പാക്കുന്ന ദേശീയ തൊഴിലുറപ്പ് പദ്ധതിപ്രകാരം 35,000 കോടി രൂപയാണ് ആവശ്യമുള്ളത്. എന്നാല്‍, ഇത് അവഗണിച്ചാണ് സമ്പന്നരുടെ വായ്പ എഴുതിത്തള്ളിയത്. കര്‍ഷകര്‍, സ്ത്രീകള്‍, യുവാക്കള്‍, ആദിവാസി സമൂഹം എന്നിവര്‍ക്കായി എന്തു പുരോഗമനപരമായ പ്രവര്‍ത്തനങ്ങളാണ് സംസ്ഥാനം ഭരിക്കുന്ന രമണ്‍സിങ് സര്‍ക്കാര്‍ ചെയ്തതെന്നും അദ്ദേഹം ചോദിച്ചു.
കോണ്‍ഗ്രസ് പുറത്തിറക്കിയ ജന്‍ ഘോഷ്‌ന പത്ര എന്ന പേരിലുള്ള പ്രകടന പത്രികയില്‍ കര്‍ഷകരുടെ ലോണ്‍ എഴുതിത്തള്ളുമെന്നും വിളകള്‍ക്ക് അടിസ്ഥാനവില ഉറപ്പാക്കുമെന്നും പ്രഖ്യാപിച്ചിട്ടുണ്ട്.