പട്‌ന: മോഷണം നടത്താനുള്ള ശ്രമം തടഞ്ഞ സഹോദരങ്ങളെ ട്രെയിനില്‍ നിന്ന് പുറത്തേക്കെറിഞ്ഞു. സംഭവത്തില്‍ ഒരാള്‍ മരിക്കുകയും മറ്റു രണ്ടുപേര്‍ക്ക് ഗുരുതരമായി പരുക്കേല്‍ക്കുകയും ചെയ്തു. പട്‌നയില്‍ നിന്ന് 371 കി.മീറ്റര്‍ കിഴക്കുമാറി കുഷന്‍ഗഞ്ജ് ജില്ലയില്‍ വച്ചായിരുന്നു സംഭവം. അസം സ്വദേശികളായ സഹോദരങ്ങള്‍ ഹൗറ- ഗുവാഹത്തി കാമരൂപ് എക്‌സ്പ്രസ് ട്രെയിനില്‍ സഞ്ചരിക്കുമ്പോഴായിരുന്നു അക്രമം. റെയില്‍പാളത്തിനോട് ചേര്‍ന്ന് രക്തത്തില്‍ കുളിച്ച നിലയില്‍ നാട്ടുകാരാണ് മൂവരെയും കണ്ടെത്തിയത്. ഉടന്‍ ആശുപത്രിയില്‍ എത്തിച്ചെങ്കിലും ഒരാള്‍ മരിച്ചിരുന്നു. മരിച്ചത് മഞ്ജു സത്‌നാമിയാണെന്ന് തിരിച്ചറിഞ്ഞതായി പൊലിസ് അറിയിച്ചു. പരുക്കേറ്റ അനില്‍ സത്‌നാമി, ബോനു സത്‌നാമി എന്നിവര്‍ ചികിത്സയിലാണ്. സംഭവത്തെക്കുറിച്ച് പൊലിസ് കേസെടുത്ത് അന്വേഷണം തുടങ്ങിയിട്ടുണ്ട്.