കേണിച്ചിറ: പൂതാടി ഗവ. ആശുപത്രിയില്‍ ആവശ്യത്തിന് ഡോക്ടര്‍മാരില്ലാത്തത് രോഗികളെ വലയ്ക്കുന്നു.
മാസങ്ങളായി ആശുപത്രിയില്‍ ഒരു ഡോക്ടറുടെ സേവനം മാത്രമാണ് ലഭിക്കുന്നത്. ഡോക്ടര്‍മാര്‍ ഇല്ലാത്തതിനാല്‍ ഇവിടെയെത്തുന്ന രോഗികള്‍ മണിക്കൂറുകള്‍ കാത്തിരിക്കേണ്ട അവസ്ഥയാണ്.
പകര്‍ച്ചവ്യാധികള്‍ പടര്‍ന്ന് പിടിക്കുന്ന സാഹചര്യത്തില്‍ നൂറുകണക്കിന് രോഗികളാണ് ദിനംപ്രതി ഇവിടെ എത്തുന്നത്. രോഗികളുടെ പ്രതിഷേധം കാരണം ജീവനക്കാരും ദുരിതത്തിലാണ്.
പഞ്ചായത്തിന് അകത്തുനിന്നും പുറത്ത് നിന്നും ആദിവാസികള്‍ അടക്കമുള്ള ആയിരക്കണക്കിന് രോഗികള്‍ വിവിധ ആവശ്യങ്ങള്‍ക്ക് ഇവിടെ എത്തുന്നുണ്ട്. നേരത്തെ നാലോളം ഡോക്ടര്‍മാര്‍ ഇവിടെ ഉണ്ടായിരുന്നു. ആവശ്യത്തിന് ഡോക്ടര്‍മാരില്ലാത്ത കാര്യം ഡി.എം.ഒയെ ഫോണില്‍ അറിയിച്ചപ്പോള്‍ മോശമായി സംസാരിച്ചതായും നാട്ടുകാര്‍ പറഞ്ഞു. ഡോക്ടര്‍മാരെ നിയമിക്കുന്നതിന് പഞ്ചായത്ത് അധികൃതരും നടപടി സ്വീകരിക്കുന്നില്ലെന്നും ആക്ഷേപമുയരുന്നുണ്ട്. ഡോക്ടര്‍മാരെ അടിയന്തരമായി നിയമിക്കുന്നതിനുള്ള നടപടികള്‍ സ്വീകരിക്കണമെന്നാണ് നാട്ടുകാരുടെ ആവശ്യം.