ചങ്ങനാശ്ശേരി: ബാങ്ക് ജീവനക്കാര്‍ ജപ്തിചെയ്ത് സീല്‍ ചെയ്ത സൈക്കിളുകള്‍ ഒന്നടങ്കം മോഷ്ടിച്ച് കുട്ടികള്‍ക്ക് വിതരണം ചെയ്ത വിരുതന്‍ അറസ്റ്റില്‍. വെങ്കോട്ട മുണ്ടുകുഴി സ്വദേശി പുതുപ്പറമ്പില്‍ രാഹുല്‍ എന്ന 19 കാരനാണ് അറസ്റ്റിലായത്. ചങ്ങനാശ്ശേരി പായിപ്പാട്ട് വെങ്കോട്ടയിലാണ് സംഭവം.
ഒന്നും രണ്ടുമല്ല, 38 ഓളം സൈക്കിളുകളാണ് മോഷണം പോയത്.
ഇത്രയും സൈക്കിളുകള്‍ കവര്‍ന്നത് 19 കാരനായിരുന്നു. നാട്ടിലെ കുട്ടികളെല്ലാം പുത്തന്‍ സൈക്കിളുമായി സവാരിക്കിറങ്ങിയതോടെ സംശയം തോന്നി കുട്ടികളെ ചോദ്യം ചെയ്തപ്പോഴാണ് മോഷണ കഥ പുറത്തുവരുന്നത്.

ഏകദേശം രണ്ടരലക്ഷം രൂപ വിലവരുന്ന സൈക്കിളുകളാണ് മോഷണം പോയത്. ഇയാള്‍ തനിച്ചാവില്ല മോഷണം നടത്തിയതെന്ന നിഗമനത്തിലാണ് പൊലിസ്. നഷ്ടപ്പെട്ട 38 സൈക്കിളുകളില്‍ കുട്ടികള്‍ക്ക് നല്‍കിയ ഏഴെണ്ണമാണ് പിടികൂടിയത്.