കൊണ്ടോട്ടി: ആകാശവീഥിയില്‍ പാറിപ്പറക്കുന്ന യന്ത്രപ്പറവകളെ ഭൂമിയിലിരുന്ന് നിയന്ത്രിക്കുന്നവരുടെ ദിനം ഓര്‍മിപ്പിച്ച് വീണ്ടും ഒക്ടോബര്‍ 20.
വിമാനങ്ങള്‍ മുഖാമുഖമെത്താതെ സുരക്ഷിത പറക്കലിന് സഹായിക്കുന്ന വിഭാഗമാണ് എയര്‍ട്രാഫിക് കണ്‍ട്രോള്‍ യൂനിറ്റ്. അന്താരാഷ്ട്ര തൊഴില്‍ സംഘടനയായ ഐ.എല്‍.ഒ ലോകത്ത് ഏറ്റവും സമ്മര്‍ദമേറിയ തൊഴിലുകളിലൊന്നായാണ് ഇതിനെ കാണുന്നത്. ഇന്റര്‍നാഷനല്‍ ഫെഡറേഷന്‍ ഓഫ് എയര്‍ട്രാഫിക് കണ്‍ട്രോള്‍ അസോസിയേഷന്‍ (ഇഫാക) നിലവില്‍വന്ന ദിവസമാണ് എയര്‍ട്രാഫിക് കണ്‍ട്രോള്‍ ദിനമായി ആചരിക്കുന്നത്.
വിമാനങ്ങളും ഹെലികോപ്റ്ററുകളും പരസ്പരം കൂട്ടിമുട്ടാതെ നിയന്ത്രിച്ച് ലക്ഷ്യസ്ഥാനത്ത് എത്തുന്നതിന് പിന്നില്‍ ഓരോ വിമാനത്താവളങ്ങളുടെ പരിധിയിലും പ്രവര്‍ത്തിക്കുന്ന എയര്‍ട്രാഫിക് കണ്‍ട്രോള്‍ യൂനിറ്റാണ്. മണിക്കൂറില്‍ 800 മുതല്‍ 900 കിലോമീറ്റര്‍ വേഗത്തില്‍ പറക്കുന്ന ജെറ്റ് വിമാനങ്ങള്‍, 350 മുതല്‍ 440 കിലോമീറ്റര്‍ വേഗത്തില്‍ സഞ്ചരിക്കുന്ന ടര്‍ബോജെറ്റ് വിമാനങ്ങള്‍, യാത്രാ വിമാനങ്ങള്‍ തുടങ്ങി ഹെലികോപ്റ്ററുകള്‍ വരെ ആകാശത്ത് വട്ടമിട്ട് പറക്കുന്നത് വ്യോമയാനപാതയെ സങ്കീര്‍ണമാക്കുന്നുണ്ട്. ഇവയെ നിയന്ത്രിച്ച് ലക്ഷ്യസ്ഥാനത്തേക്ക് എത്തിക്കുകയാണ് എയര്‍ട്രാഫിക് കണ്‍ട്രോളിന്റെ ദൗത്യം. ആകാശത്ത് സഞ്ചരിക്കുന്ന പതിനായിരക്കണക്കിന് മനുഷ്യരുടെ ജീവന്‍ ഇവരുടെ വിരല്‍ത്തുമ്പുകളിലാണുള്ളത്.
പതിനായിരത്തിലേറെ ജീവനക്കാരാണ് ഈ വിഭാഗത്തില്‍ ഇന്ത്യയിലുള്ളത്.