ലണ്ടന്‍: ചാംപ്യന്‍സ് ട്രോഫിക്ക് പിന്നാലെ ഇംഗ്ലണ്ടിലും വെയ്ല്‍സിലുമായി മറ്റൊരു ഐ.സി.സി അന്താരാഷ്ട്ര പോരാട്ടത്തിന് ഇന്ന് തുടക്കമാകുന്നു. ഐ.സി.സി വനിതാ ഏകദിന ക്രിക്കറ്റ് ലോകകപ്പിനാണ് ഇന്ന് അരങ്ങുണരുന്നത്. ഇന്ന് മുതല്‍ ജൂലൈ 23 വരെ അരങ്ങേറുന്ന ടൂര്‍ണമെന്റിന്റെ പതിനൊന്നാം പതിപ്പാണിത്. ഇന്ത്യയടക്കം എട്ട് ടീമുകളാണ് മാറ്റുരയ്ക്കുന്നത്. 1973 മുതലാണ് ടൂര്‍ണമെന്റ് തുടങ്ങിയത്. ആദ്യമായാണ് ഇത്ര ദൈര്‍ഘ്യത്തില്‍ ലോകകപ്പ് സംഘടിപ്പിക്കുന്നത്. ഇന്ത്യ, ആസ്‌ത്രേലിയ, ഇംഗ്ലണ്ട്, ന്യൂസിലന്‍ഡ്, പാകിസ്താന്‍, ദക്ഷിണാഫ്രിക്ക, വെസ്റ്റിന്‍ഡീസ്, ശ്രീലങ്ക ടീമുകളാണ് കിരീടത്തിനായി മാറ്റുരയ്ക്കുന്നത്. 

പ്രാഥമിക റൗണ്ടില്‍ ഓരോ ടീമും ഏഴ് വീതം മത്സരങ്ങളാണ് കളിക്കേണ്ടത്. ഏറ്റവും കൂടുതല്‍ പോയിന്റ് നേടുന്ന നാലു ടീമുകള്‍ നേരിട്ട് സെമിയിലേക്ക് കടക്കും. ഇന്ന് ഉദ്ഘാടന മത്സരത്തില്‍ ഇന്ത്യ ആതിഥേയരായ ഇംഗ്ലണ്ടുമായി ഏറ്റുമുട്ടും. ഇന്നത്തെ മറ്റൊരു മത്സരത്തില്‍ ന്യൂസിലന്‍ഡ് ശ്രീലങ്കയുമായും ഏറ്റുമുട്ടും.
ആസ്‌ത്രേലിയയാണ് നിലവിലെ ചാംപ്യന്‍മാര്‍. ഏറ്റവും കൂടുതല്‍ തവണ കിരീടം നേടിയ ടീമും ഓസീസ് തന്നെ. ആറ് തവണയാണ് അവര്‍ കിരീടത്തില്‍ മുത്തമിട്ടത്. ആതിഥേയരായ ഇംഗ്ലണ്ട് മൂന്ന് തവണയും ന്യൂസിലന്‍ഡ് ഒരു തവണയും ജേതാക്കളായി. ഇതുവരെ മൂന്ന് ലോക ജേതാക്കള്‍ മാത്രമേ വനിതാ ലോകകപ്പില്‍ പിറന്നിട്ടുള്ളു. ഒരേയൊരു തവണയാണ് ഇന്ത്യ ഫൈനലിലെത്തിയിട്ടുള്ളത്. 2005ലെ ഫൈനലിലെത്തിയ ഇന്ത്യക്ക് പക്ഷേ ആസ്‌ത്രേലിയന്‍ കരുത്തിന് മുന്നില്‍ കിരീടം അടിയറ വയ്‌ക്കേണ്ടി വന്നു. അന്ന് 98 റണ്‍സിനാണ് ഇന്ത്യ പരാജയപ്പെട്ടത്. ഏകദിന റാങ്കിങില്‍ ഇന്ത്യയുടെ വനിതാ ടീം നിലവില്‍ അഞ്ചാം സ്ഥാനത്താണ്. മികച്ച പ്രതിഭകളുള്ള ടീമുമായാണ് ഇന്ത്യ പോരിനിറങ്ങുന്നത്. ക്യാപ്റ്റന്‍ മിഥാലി രാജാണ് ടീമിന്റെ ഐക്കണ്‍.