തൊടുപുഴ:  കദളിക്കാട് വിമലമാതാ പള്ളിയില്‍ നേര്‍ച്ചക്കുറ്റി തകര്‍ത്ത് പണാപഹരണം. വെള്ളിയാഴ്ച  രാത്രി ഒന്നോടെയാണ് സംഭവമെന്ന് കരുതുന്നു. പളളി സങ്കീര്‍ത്തിയുടെ വാതില്‍ പൊളിച്ച് അകത്തുകയറിയ മോഷ്ടാക്കള്‍ നാലു നേര്‍ച്ചപ്പെട്ടികള്‍ പുറത്തെത്തിച്ചു. തുടര്‍ന്ന് രണ്ടു ഇരുമ്പുനേര്‍ച്ചപ്പെട്ടികള്‍ പൊളിച്ച് അതിലുണ്ടായിരുന്ന പണം  അപഹരിച്ചു.
ഏതാനും നാണയതുട്ടുകള്‍ അതില്‍ അവശേഷിക്കുന്നുണ്ട്. തടിയില്‍ തീര്‍ത്ത രണ്ടു നേര്‍ച്ചപ്പെട്ടികള്‍ കുത്തിപൊളിച്ചില്ല.  പള്ളിയോട് ചേര്‍ന്നുള്ള മുറിയില്‍ സൂക്ഷിച്ചിരുന്ന പിക്കാസ്, തൂമ്പ എന്നിവയ്ക്കു പുറമെ മോഷ്ടാവ് കൊണ്ടുവന്നതെന്നു കരുതുന്ന  ചുറ്റികയും നേര്‍ച്ചപ്പെട്ടികള്‍ക്കു സമീപം  ഉപേക്ഷിക്കപ്പെട്ട നിലയില്‍ കണ്ടെത്തി.
വെള്ളിയാഴ്ച രാത്രി ഈ ഭാഗത്ത് വാഴക്കുളം പൊലിസ് പട്രോളിങ് നടത്തിയിരുന്നു.ജീപ്പിന്റെ വെളിച്ചം ശ്രദ്ധയില്‍ പെട്ടതോടെ മോഷ്ടാക്കള്‍ മറ്റ് നേര്‍ച്ചപ്പെട്ടികള്‍ കുത്തിത്തുറക്കാനുള്ള ശ്രമം ഉപേക്ഷിച്ച് കടക്കുകയായിരുന്നുവെന്ന് കരുതുന്നു.
പള്ളി സങ്കീര്‍ത്തിയുടെ വാതില്‍ തുറന്നു കിടക്കുന്നതു ശ്രദ്ധയില്‍പ്പെട്ട പൊലിസ് വാഹനം നിര്‍ത്തി വികാരി  ഡോ. തോമസ് ചെറുപറമ്പിലിനെ വിളിച്ചുണര്‍ത്തി വിവരം ധരിപ്പിച്ചു. തുടര്‍ന്നു നടത്തിയ അന്വേഷണത്തിലാണ് നേര്‍ച്ചപ്പെട്ടികള്‍ സമീപത്തെ സ്‌കൂള്‍മുറ്റത്തുനിന്നു കണ്ടെത്തിയത്.
രാത്രി തന്നെ  പ്രദേശത്ത് പൊലിസ് പരിശോധന നടത്തിയെങ്കിലും തുമ്പു ലഭിച്ചില്ല. വിരലടയാള വിദഗ്ധര്‍ സ്ഥലത്തെത്തി തെളിവുകള്‍ ശേഖരിച്ചു. വാഴക്കുളം എസ്‌ഐയുടെ നേതൃത്വത്തില്‍ അന്വേഷണം ആരംഭിച്ചു.