കല്‍പ്പറ്റ: സംസ്ഥാന ജനറല്‍ സെക്രട്ടറി കെ. സുരേന്ദ്രനെ പൊലിസ് അറസ്റ്റ് ചെയ്തതില്‍ പ്രതിഷേധിച്ച് ബി.ജെ.പി ജില്ലാ കമ്മിറ്റിയുടെ നേതൃത്വത്തില്‍ കല്‍പ്പറ്റയില്‍ റോഡ് ഉപരോധിച്ച 25ഓളം പ്രവര്‍ത്തകര്‍ക്കെതിരേ പൊലിസ് കേസെടുത്തു.
കഴിഞ്ഞ ദിവസത്തെ ഹര്‍ത്താലിനെ തുടര്‍ന്ന് വാഹനം തടഞ്ഞ 65 പേര്‍ക്കെതിരേയും പൊലിസ് കേസെടുത്തിട്ടുണ്ട്. കല്‍പ്പറ്റയില്‍ 25 പേര്‍ക്കെതിരേയും സുല്‍ത്താന്‍ ബത്തേരിയില്‍ 40 പേര്‍ക്കെതിരേയുമാണ് പൊലിസ് കേസ് രജിസ്റ്റര്‍ ചെയ്തിരിക്കുന്നത്.
പ്രകടനമായെത്തിയ ബി.ജെ.പി പ്രവര്‍ത്തകര്‍ കല്‍പ്പറ്റ ചുങ്കം ജങ്ഷനിലാണ് റോഡ് ഉപരോധിച്ചത്. ഒരു മണിക്കൂറോളം ഉപരോധം നീണ്ടുനിന്നു. എന്നാല്‍ പൊലിസിന്റെ അവസരോചിത ഇടപെടല്‍ ഗതാഗതം സുഗമമാക്കാന്‍ സഹായിച്ചു. വാഹനങ്ങളെല്ലാം ബൈപ്പാസിലൂടെ കടത്തിവിട്ടതിനാല്‍ ഉപരോധം തീര്‍ത്തത് യാത്രക്കാര്‍ക്ക് ബുദ്ധിമുട്ടായില്ല.
ബി.ജെ.പി സംസ്ഥാന കമ്മിറ്റിയംഗം കെ. സദാനന്ദന്‍ ഉപരോധം ഉദ്ഘാടനം ചെയ്തു. ജില്ലാ പ്രസിഡന്റ് സജി ശങ്കര്‍ അധ്യക്ഷനായി. സമരത്തിന് പി.ജി ആനന്ദ് കുമാര്‍, കെ ശ്രീനിവാസന്‍, കെ മോഹന്‍ദാസ്, കൂട്ടാറ ദാമോദരന്‍ വി മോഹനന്‍, കെ.പി മധു തുടങ്ങിയവര്‍ നേതൃത്വം നല്‍കി.