കോഴിക്കോട്: വാളയാര്‍ ലൈംഗികപീഡന കേസിലെ ഇരകളായ പെണ്‍കുട്ടികള്‍ ആത്മഹത്യ ചെയ്യുകയായിരുന്നുവെന്ന് സി.പി.എമ്മിന്റെ വനിതാ വിഭാഗമായ ജനാധിപത്യ മഹിളാ അസോസിയേഷന്‍ സമ്മേളന പ്രമേയം. ഇന്നലെ കോഴിക്കോട്ട് സമാപിച്ച അസോസിയേഷന്‍ സംസ്ഥാന സമ്മേളനത്തില്‍ അവതരിപ്പിച്ച പ്രമേയത്തിലാണു വിവാദ പരാമര്‍ശമുള്ളത്. പെണ്‍കുട്ടികളുടെ മരണം ആത്മഹത്യയാണെന്നു വിശേഷിപ്പിച്ച പ്രമേയം, കേസിലെ പ്രതികളെ വെറുതെവിട്ട നടപടി ഞെട്ടിക്കുന്നതാണെന്നും പ്രസ്താവിച്ചു. കേസില്‍ പുനഃപരിശോധനാ ഹരജി നല്‍കണമെന്നും പ്രമേയം ആവശ്യപ്പെട്ടു.

'പാലക്കാട് ജില്ലയിലെ വാളയാര്‍ അട്ടപ്പള്ളത് എട്ടും പതിനൊന്നും വയസുള്ള ദലിത് പെണ്‍കുട്ടികള്‍ ലൈംഗിക പീഡനത്തെത്തുടര്‍ന്ന് ആത്മഹത്യ ചെയ്ത കേസില്‍ പ്രതികളെ വെറുതെ വിട്ട സംഭവം മനസാക്ഷിയെ ഞെട്ടിക്കുന്നതാണ്.'- പ്രമേയം ചൂണ്ടിക്കാട്ടി.

ഇരുവരുടെയും മരണം കൊലപാതകമാണെന്നും അതില്‍ അന്വേഷണം വേണമെന്നും ആവശ്യപ്പെട്ട് വിവിധ കോണുകളില്‍ നിന്ന് ആവശ്യം ഉയരുന്നതിനിടെയാണ് ജനാധിപത്യ മഹിളാ അസോസിയേഷന്‍ സംഭവം ആത്മഹത്യയാണെന്ന് ഉറപ്പിച്ച് പ്രമേയം അവതരിപ്പിച്ചത്.

അതേസമയം, സംഭവത്തില്‍ കുറ്റക്കാര്‍ ആരായാലും ശിക്ഷിക്കപ്പെടണമെന്നും അതിനു വേണ്ടി ആവശ്യമായ എല്ലാ നടപടികളും സര്‍ക്കാര്‍ സ്വീകരിക്കണമെന്നും സി.പി.എം ജില്ലാ കമ്മിറ്റി പ്രസ്താവനയിലൂടെ ആവശ്യപ്പെട്ടു. പെണ്‍കുട്ടികളുടെ കുടുംബത്തിനു നീതി കിട്ടണം. കുറ്റക്കാര്‍ ആരായാലും രക്ഷപ്പെടാന്‍ അനുവദിക്കരുത്. അവരെ നിയമത്തിനു മുന്നിലെത്തിക്കാന്‍ സര്‍ക്കാര്‍ കര്‍ശന നടപടി സ്വീകരിക്കണം. കേസ് വാദിക്കുന്നതില്‍ പ്രോസിക്യൂഷനോ, അന്വേഷണത്തില്‍ പൊലീസിനു വീഴ്ചയുണ്ടായിട്ടുണ്ടോ എന്ന് സര്‍ക്കാര്‍ പരിശോധിക്കണം. കുട്ടികളുടെ മരണം സംബന്ധിച്ചു സമഗ്ര അന്വേഷണം നടക്കണം. സംഭവത്തിലെ ദുരൂഹത നീക്കി യാഥാര്‍ഥ്യം പുറത്തുകൊണ്ടുവരണമെന്നും സിപിഎം ജില്ലാ കമ്മിറ്റി ആവശ്യപ്പെട്ടു.

valayar rape case: aidwa states both death are suicides